İşğal etilgen Qırımda Canköyden nefaqacığa "RF ordusını itibardan tüşürüv" maddesi ile eki kere para cezası berildi. Onı qomşu araba qapılarına Ukrayina destegine yazılar yazğanında qabaatladılar. Qırım sakinleriniñ cenkke qarşı fikirleri, qoralarda ifadeleri içün taqip etilmesi ilk sefer degil. Qırımda cenkke qarşı ikâyeler aqqında Qırım.Aqiqatnıñ materialında aytıp beremiz.
Rusiyeniñ Ukrayinağa büyük cenkiniñ başlamasından berli Rusiye akimiyeti Qırım sakinlerini bu arbiy areketlerge qarşı er angi narazılıq köstermeleri sebebinden taqip ete. Büyük cenk başlanğanından berli Rusiye İdariy suçlar qanunnamesiniñ 20.3.3 "cenkke qarşı" maddesi ile elliden çoq adam para cezasına mahküm etildi, dep bildireler Prezidentniñ Qırım MC daimiy temsilciliginde.
Adamlar er angiy araket içün mahkeme etile bile. Misal olaraq, ukrayin türkülerini diñleseler ya da cenk aqqında laf etseler. Bir afta evel ise Qırımda qomşularınıñ qorasına yazılar yazğan kişige para cezası berildi.
''Qazaqlar: cemidan, vokzal, moskovada''
Qoralardaki yazılar aqqında davanı Rusiye nezareti astında olğan Canköy rayon mahkemesi baqqan. Davada kösterilgen allar daa yazda olğan.
Mahkme qararına köre, Canköy rayonındaki hususiy bir evniñ araba qapısında böyle yazı edi: "Qazaqlar: cemidan, vokzal, moskovada" ve "Şan olsun Ukrayinağa".
Daa bir alda yazı hususiy evniñ qorasında edi: "Nişaret: kim hızmet etti şan olsun Ukrayinağa".
Bunda 70 yaşındaki yerli sakin Vasiliy Avramova qabaatlandı.
O mahkemede qabaatını red etti. Birinci sefer evde olğanını ve bir şey yazmağanını bildirdi. Ekinci vaziyette de yuqlaganı içün bir şey körmedi ve bilmey, dedi.
Mahkeme Rusiye quvetçileriniñ protokollarına, dava materiallarına, şaatlarnıñ ifadelerine esaslanıp Vasiliy Avramovnı qabaatlı tanıdı.
Mahkemeci Stanislav Yürçenko bu qanun bozma "cemaat nizamına ve telükesizligine qast ete" dep bildidrdi ve nefaqacığa 100 biñ rublelik eki para cezasını tayin etti.
Renkler içün basqı
Ukrayina prezidentiniñ Qırım MC Daimiy temsilcisi Tamila Taşeva Vasiliy Avramovnıñ ikâyesini cenkke qarşı fikirler içün Qırım sakinleriniñ qanunsız sürette taqip etilmesiniñ nevbetteki faktı dep adlandırdı.
Qırımda qoralardaki resimler adamlarnıñ "cenkke qarşı baqışlar" qabaatı ile taqip etmek içün bir sebep ola. Buña Kefeden göñülli Aleksandr Talipov tarafından yarımadada teşkil etilgen "Krımskiy SMERŞ" arbiy areketniñ faalleri yardım ete.
Bundan evel Aqmescitte garaj saibi qapısını sarı ve mavı tüske boyalağanı içün er kes ögünde afu soramaq mecbur oldı.
Talipov Aqmescit sakini garajnıñ qapısını başqa tüske boyalamağa söz bergeni ile video yayınladı.
Aleksandr Talipov Qırımda iç bir şeyge baqmadan Ukrayinanı desteklgenler çoq.
"Ukrayina Silâlı Quvetlerini beklegenler onlarnen. Episi İİN tarafından esapqa alınğan. Er biri nezaret altındadır, olarğa dair belli bir sıñırlavlar bar. Eger bu insanlara böyle bir şey yapqan vaqıtta bir daa tutulsa olarnı vatandaşlıqtan marum etmek ve memelket tışına quvmaq kerek dep sayam", - dep bildirgen edi Talipov.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
