Bazarertesi, noyabrniñ 4-ü, ilhaq etilgen Qırımda rusiyeli Halq Biriligi Künü sebebinden raatlıq künüdir.
Bundan sebep yarımadada bir sıra tedbir keçirilecek ola, onıñ içün Rusiye nezaretindeki şeer ve rayon akimiyetleri yollarda naqliyat yürüşi sıñırlanacağı aqqında haber ete.
Eñ büyük bayram merasimleri Aqmescitte keçecek. Şeer memuriyeti, Lenina meydanında esnaf yarmalığı ve Rusiye halq yemekleri festivali olacağını bildire. Bundan ğayrı, şeerniñ baş soqaqlarında avto yürüş, sport yarışmaları ve yerli taqımlarnı bayram kontserti olacaq. Fişenk saat 21:00 patlaycaq.
Aqyarnıñ bayram programmasında esasen kontsert çıqışları, Aqyarnıñ milliy-medeniy cemiyetlerniñ sergileri ve bala ekskursiyaları olacaq.
Qomşu Rusiyede 2005 senesi noyabr 4-ünden berli Halq Biriligi Künü devlet bayramını qutlaylar. Bu bayramnı keçirmek teşebbüsini Rusiye Dinlerara Şurası kösterdi. Qırımda bu künni ilhaqtan soñ qutlap başladılar.
Bundan evel Rusiyede ve işğal etilgen Qırımda 2018 senesi dekabrniñ 30-ı – 2019 senesi yanvarniñ 8-i, fevralniñ 23-24-ü, martnıñ 8-10-u, mayısnıñ 1-5-i, noyabrniñ 2-4-ü (Halq birligi künü) raatlıq künleri olaraq ilân etilgen edi. Bundan ğayrı, iyünniñ 12-si – Rusiye künü – tatil olacaq.
