Qırım işğalden azat etilgen soñ, keçüv devrinde yavaş-yavaş grajdanlıq memuriyetine keçecek arbiy memuriyet teşkil etilmeli. Bunı Ukrayina Prezidentiniñ Qırım MC daimiy temsilcisi Tamila Taşeva bildirdi.
Onıñ sözlerin köre, böyle bir teklif Qırımnıñ işğalden azat etilmesi Strategiyasına deñişmeler kirsetilmesi çerçivesinde Milliy telükesizlik ve mudafaa şurasına baqıluvğa berilgen.
"Bizim baqışımız şundan ibarettir ki, başında arbiy memuriyet olmalı, soñra arbiy memuriyetten arbiy-grajdanlıq memuriyetine keçme ve birazdan grajdanlıq yaşayışqa keçme olmalıdır", - dedi Taşeva.
Taşeva, keçüv devriniñ dört esas elementten ibaret olğanını hatırlattı: zaraz körgenler içün tazminat, cenk cinayetleriniñ qurbanları içün kerçekni bilme aqqı, olğanlarnıñ bir daa tekrarlanmaması içün islâat ve insan aqlarını bozıp, cenk cinayetlerini yapqanlarnı mesülietke çeküv.
Evel Tamila Taşeva, Kıyiv büyük ihtimalnen işğal etilgen Qırımnı arbiy yolnen azat etecegini bildirdi. "Yerli eali ve arbiyler arasında ğayıplarnı ve grajdanlıq infraterkipniñ mahv etilüvini azğarğa endirmek içün siyasiy ve diplomatik yolnı da köz ögümizde tutamız, amma yarımadanıñ azat etilüvi büyük ihtisalnen arbiy yolnen olacağını pek yahşı añlaymız", - dedi o.
Daa evel Ukrayina prezidenti ofisiniñ yolbaşçı mesleatçısı Mıhaylo Podolâk Qırım.Aqiqat jurnalistlerine Ukrayina Qırımnı beş-yedi aydan qaytarır, dep aytqan edi. Onıñ aytqanına köre, Rusiyeniñ tam istilâsı yarımadanı işğalden qurtaruv esaslarını doğurdı.
Milliy telükesizlik şurasınıñ kâtibi Oleksiy Danılov "Qırımnıñ işğalden azat etilmesi içün 12 adım" adlı yazını yayınlağan edi. Teklifler arasında "rus şerefi şeeri"niñ " "Obyekt № 6" olaraq yañıdan adlandırılması da bar.
Bundan ğayrı Danılov Qırımda "Rusiye arbiy gemisi siktir ket" abidesini tiklemege, 2014 senesinden soñ Qırımğa kelgen RF vatandaşlarını andan sürgün etmege ve Qırım köprüni sökmege teklif ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
