Ukrayına Qırımnı beş-yedi aydan qaytarır, dep ayttı Ukrayına prezidenti ofisiniñ yolbaşçı mesleatçısı Mıhaylo Podolâk Qırım.Aqiqat jurnalistlerine. Onıñ aytqanına köre, Rusiyeniñ tam istilâsı yarımadanı işğalden qurtaruv esaslarını doğurdı.
«Qısqa bir vaqıt içinde, tarihiy ceetten altı ay az sayıla, beş ya da yedi aydan Qırımda olacaqmız. Belki, pek optimistik, amma esaplanğan bir optimizm. Daa bir kere aytam, Rusiyeniñ vaziyetni tuta bilecek imkânları yoq. Cenk mantığı belli, ve Qırım vaziyetini Yalta yalısında muzakere ete bilemiz. Qırımnıñ semereli kelecegi aqqında kesen-kes laf etecekmiz», – dep qayd etti o.
Qırım içün cenk olacaqmı sualine Podolâk bu cenk bir topraq içün degil, medeniy bir dünyanıñ bar oluv aqqı içün kete, dep cevap berdi.
«Cenk Qırım içün olmaycaq! Halqara uquq çerçivesinde demokratik dünyanıñ bar oluv aqqı oğrunda cenk olacaq… Bu topraq içün bir cenk degil, bu unsurlardan biri tek. Bu cenk kimse eviñizge kelip, «Daa çoq silâm bar, daa çoq qanatlı raketam bar, istegenimni beriñiz» dep aytıp olamasın dep kete. Bugün medeniy dünyanıñ bar oluv aqqı oğrunda cenk kete. Bu medeniy dünyada bu şekilde Rusiyeniñ yeri yoq. Ve şunıñ içün, şübhesiz, bütün Ukrayına azat etilgenine qadar cenk olacaq», – dep qayd etti Podolâk.
Rusiyede em raketa, em silâ yetmey, dep qayd etti Ukrayına memurı. Ateş açmaycaq demek degil, amma, Podolâk Rusiye ne Qırım, ne Donetsk, ne Lugansknı tutıp olur, dep tüşüne.
Uydu resimleri Qırımnıñ şimalinde «Ermeni Bazar» ve Perekop Rusiye keçiş noqtaları rayonında çift oko yolağı bar, dep köstere. Uydu fotoresimleri YE-105 yolunıñ eki tarafında da ve Sivaş gölü yanında yañı fortifikatsion inşaatlarnı kösterdi.
Fevralniñ 24-nde Ukrayına prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirdi.
Ukrayına prezidenti ofisiniñ yolbaşçı muavini İğor Jovkva Qırım.Aqiqatqa intervyü berip, Ukrayınanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep ayttı. Onıñ qayd etkenine köre, kimse Qırım Kyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
