Yarımadadan çıqmağa istegen qırımlılar yaşağan yerinde Rusiye arbiy komissarlığından izin almalı. Bu aqta «Krıminform» Rusiye devlet agentligi Qırımnıñ Rusiye seferberlik işi ve territorial mudafaa hızmetiniñ yolbaşçısı Viktor Fesenkonıñ malümatına esaslanıp haber ete.
«Vatandaş arbiy komissarlıqqa muracaat etip, ariza yazmalı ya da bir vesiqa bermeli. Soñra arbiy komissarlıq baqacaq ve sebebi olsa, çıqış iznini berecek. Meselâ, iş, oquş ya da tedaviylevge barmağa kerek olsa», – dep bildirdi Fesenko.
O, insanğa celpname bermege çare olmasa, onen cep telefonı vastasınen bağlanacaqlar, dep qoştı.
«Vatandaşnıñ cep telefonı bar, oña telefon ete bileler. Telefon etilgen soñ vatandaş arbiy komissarlıqqa kelip, ne içün telefon etilgenini bilmek kerek», – dep ayttı Fesenko.
Daa sentâbrniñ 22-nde Qırımnıñ Rusiye yolbaşçısınıñ mesleatçısı Oleg Krüçkov Fesenkonıñ malümatına esaslanıp, «Qırımdan çıqmaq yasaq degil», dep bildirdi.
Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi.
Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa.
İşğal etilgen Qırımnıñ tahminen 5000 sakini Rusiye prezidenti ilân etken qısmiy seferberlikten soñ arbiy komissarlıqqa celpname aldı.
Daa evel berilgen malümatqa köre, Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
