Yaqın künlerde, Qırım işğali sebebinden, Rusiye prezidenti Vladimir Putin ve onıñ yaqınlarına qarşı sanktsiyalar kerginleşecek.
Bu aqta “Prâmoy” ukrain televizion kanalınıñ efirinde Qırımtatar halqınıñ aqlarını qorçalav komitetiniñ koordinatorı, Meclis azası Eskender Bariyev.
“Soñki eki afta devamında Avropa parlamenti, AQŞ Kongressi ve Devlet Departamentinde keçirilgen tedbirler ve qabul etilgen qararlarnı körip, olarnıñ neticesi ne olacağını añlaya bilemiz. Hususan, men de iştirak etken, “NATO-Ukraina” qapalı oturışında ciddiy qararlar alınğan edi. Bellesem, yaqın künlerde bir qaç ciddiy hitap ve Putin ve onıñ yaqınlarına qarşı sanktsiyalarnıñ kerginleşecegini körecemiz”, - dedi Bariyev.
Rusiye prezidenti Vladimir Putin martnıñ 18-nde işğal etilgen Qırım ve Aqyarnı ziyaret etip, yarımada işğaliniñ beşinci yılına bağışlanğan tedbirlerde iştirak etecek, dep bildire Kremlniñ matbuat hızmeti.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
