Rusiye kontrolindeki Qırım yolbaşçısı Sergey Aksenovnıñ bildirgenine köre, işğal altındaki yarımadada Yaponiyadan qaytqan yerli sakinniñ koronavirus yuqunçı tasdıqlandı.
Bu aqta o, Facebook saifesinde yazdı.
Aksenovnıñ aytqanına köre, qırımlı kelgeninden berli izolâtsiyada ve er künlik tibbiy közetüv altında bulundı.
«Laborator tedqiqleriniñ neticelerine köre hasta biologik telükesizlik tedbirlerine riayet etilip, yuqunç hastahanesine alındı. Hastalıqnıñ klini alâmetleri körünmey», – dep yazdı Aksenov.
Onıñ qayd etkenine köre, al-azırda Qırımda 23 yañı koronavirus yuqunçı hastası bar, 19-ı ketirildi, dördü – eki qorantadan yerli ola. Onıñ aytqanına köre, daa beş kişi tüzelip hastahaneden çıqarıldı.
«Yaqın çevresinde olğan insanlar yuqunç bölüklerine alındı, uzaq çevresinden insanlar yaşağan yerlerinde izolâtsiyada tibbiy közetüv altında qala. Bu vatandaşlarnıñ laborator tedqiqleri yapıla», – dep bildirdi Aksenov.
Aprelniñ 7-nde Aksenov yañı hastalar qayd etilse, koronavirus tarqaluvına yol bermemek içün sıñırlav tedbirlerini sertleştirecek, dep qorquzdı.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
