Qırımda 15 yaşında Taqyuddin – Rusiye quvetçileri İçki rayonınıñ Yanış Taqıl (Zavetnoye) köyünde tintüv keçirip alıp ketken Sahiba Burhanovanıñ oğlu – anasına qarşı protokol tizildi ve onı mahkemede baqmağa planlaştıralar, dep bildirdi.
Bu aqta «Qırım birdemligi» cemaat birleşmesi Qırım.Aqiqatqa bildirdi.
«Amma İçki rayon mahkemesinde diñleyicilerge Burhanova ketirilmedi ve oña qarşı dava malümatları yoq, dep aytalar. Mahkemege kelgen insanlar qasevetlene – köydeşleri ve qomşuları qayda olğanını bilmeyler», – dep ayta faaller.
Qırımnıñ uquq qoruyıcı organları resmiy izaat bermey.
Yanış Taqıl (Zavetnoye) köyünde keçirilgen tintüv aqqında faaller mayısnıñ 11-nde saba bildirdi. Rusiye quvetçileri çağına yetmegen eki balanıñ anası Sahiba Burhanovanı İçki rayonındaki Rusiye İç işler nazirligi bölüginiñ migratsiya meseleleri bölügine alıp ketkenler. Aqmescit civarındaki Dubki köyünde de tintüv keçirilgeni belli oldı.
Rusiye quvetçileri «Qırım birdemliginiñ» faali Raul Dittanğa Aqmescit civarındaki Dubki köyünde mayısnıñ 11-nde keçirilgen tintüv vaqtında ev yanında video çıqarmağa yasaq etti. Bundan ğayrı, bugün İçki rayonındaki evinde tintüv keçirilgen Ayub Rahimovnıñ bulunğanı tahmin etilgen evge advokat Siyar Paniç kirsetilmey.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
