Rusiye quvetçileri «Qırım birdemliginiñ» faali Raul Dittanğa Aqmescit civarındaki Dubki köyünde mayısnıñ 11-nde keçirilgen tintüv vaqtında ev yanında video çıqarmağa yasaq etti. Bundan ğayrı, bugün İçki rayonındaki evinde tintüv keçirilgen Ayub Rahimovnıñ bulunğanı tahmin etilgen evge advokat Siyar Paniç kirsetilmey.
Bu aqta «Qırım birdemligi» cemaat birleşmesi Qırım.Aqiqatqa bildirdi.
Faaller Dubki köyünde Rusiye Tahqiqat komiteti, Ekstremizm ile küreş merkezi ve OMON hadimleri çalışa, dep bildirdi.
«OMON hadimi çetke çekilmemni istey, dep ayttı ve bunı aytmaq içün bir qanuniy sebepke acet yoq dedi. Evden 100 metr mesafede bulunamız. Olar foto ve video çıqarmağa bermeyler», – dedi Dittan.
Faallerniñ bildirgenine köre, Yanış Taqıl (Zavetnoye) köyünde Rahimov yaşağan evde tintüv neticesinde 2 cep telefonı ve bilgisayar alındı.
Qırımnıñ uquq qoruyıcı organları adiseni resmiy şekilde izaatlamaylar.
Yanış Taqıl (Zavetnoye) köyünde keçirilgen tintüv aqqında faaller mayısnıñ 11-nde saba bildirdi. Rusiye quvetçileri çağına yetmegen eki balanıñ anası Sahiba Burhanovanı İçki rayonındaki Rusiye İç işler nazirligi bölüginiñ migratsiya meseleleri bölügine alıp ketkenler. Aqmescit civarındaki Dubki köyünde de tintüv keçirilgeni belli oldı.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
