Transformator noqtasında yanğın çıqqanından sebep, Bağçasaraynıñ bir qısmı elektrik teminatsız qaldı, dep bildire “Krımenergo” şirketiniñ matbuat hızmeti.
Energetiklerniñ bildirgenine köre, yanvar 23-ünde saba “KTP 10/0,4 kV yanğını çıqtı”, qaza aqibetlerini yoq etile.
“108 ev ve 3 uquqiy adres yarıqsız qaldı. Qullanıcılarnıñ energetik teminatını devam ettirmek içün, energetikler bozulğan levazimatnı deñiştire”, - denile beyanatta.
Yanğın sebepleri ögrenile.
Yanvar 17-sinde şiddetli yel sebebinden Bağçasaray rayonınıñ bir qaç meskün yeri yarıqsız qalğan edi.
2016 senesi baarde rus energoköprüniñ üçünci pıtağı işini başlağanına baqmadan, Qırımda yarıq söndürmeleri devam etmekte. 2015 senesi dekabrden başlap Herson vilâyetinde energetik tiremelerniñ bozulğanından soñ, Ukrainadan Qırımğa elektroenergiya berilmey. Şimdilik, Qırım öz generatorları, Rusiye generatorları ve Kuban energoköprüniñ elektrik ağını qullana.
