Yaltadaki «Hizb ut-Tahrir davasınıñ» mabüsleri Rusiye Anayasası tüzetüvlerine rey bermekten vazgeçti. Bu aqta «Qırım birdemligi» Ukrainanıñ Rostov-na-Donu baş konsulı Taras Malışevskiyniñ malümatına esaslanıp bildirdi.
«Rostov-na-Donudaki SİZO-1-de ve Taganrogdaki SİZO-2-de bütün balalar memuriyetke ve saylav komissiyasına Ukraina vatandaşları olğanını ve Rusiyede iyülniñ 1-nde olğanlarnen iç bir alâqası olmağanını bildirdi. Qırımlı musulmanlarnıñ printsipial ve metanet olğanını körgen «irade bildirüvniñ» teşkilâtçıları vatandaşlarımızğa basqı yapmadı ve iqna etmedi», – dedi Malışevskiy.
Berilgen malümatqa köre, Yaltadaki «Hizb ut-Tahrir davasınıñ» altı mabüsini etapqa azırlaylar.
«Hizb ut-Tahrir» gruppası qayda ketecegini bilmeymiz, olar bir-birine menim üzerimden tileklerini bildirdi, aralarında bağ yoq. Belki, bir etapqa tüşerler, soñ ayırırlar, belki de, yoq. Bu etap ne qadar olacaq – bir ay ya da beş afta bilmeymiz, etap vaqtında olarnen bağlı malümatımız sıñırlı olacaq. Pek fenalaşqan sağlıqlarınen etapqa keteler», – dep ayttı Malışevskiy «Ğromadske radio» yayınında.
Cumaaqşam künü, iyünniñ 25-nde, Moskva vilâyetiniñ (Rusiye) Vlasiha şeerindeki Arbiy istinaf mahkemesi Yaltadaki «Hizb ut-Tahrir davasınıñ» altı mabüsiniñ ükmüni deñiştirmeyip qaldırdı.
Böylece, Rostov-na-Donu Cenübiy okrugınıñ arbiy mahkemesiniñ 2019 senesi qabul etken qararı deñişmedi. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
