Yaltadaki «Hizb ut-Tahrir davasınıñ» mabüsi Vadim Siruknıñ ömür arqadaşı Anna Bogaçevanıñ bildirgenine köre, aqayı Rostov SİZOsından başqırt koloniyasına avuştırılğan soñ ilk sefer telefon etip oldı. O, kameralardaki dış sebebinden olğan büyrek yanğısından tedaviylene, dep tarif etti.
«Yavaş-yavaş tibbiy meseleler çezile – dımlı kameralarda uzun vaqıt qalğan soñ çıqqan büyrek yanğısı. Taliller alındı, tedaviylevi belgilendi, ilâclar berildi. Koloniyada ultrases talili apparatı yoq, ve hastahanede tedqiq yapmağa imkân olmaycaqtır», – dep yazdı Bogaçeva Facebooktaki saifesinde.
Onıñ aytqanına köre, aqayı koloniyadaki karantin sebebinden telefon etip olamadı, çünki telefon etmek içün vesiqalarnen bağlı problemler bar edi.
«Em de kelgen soñ 17 kün ceza izolâtorında qaldı», – dep tarif etti Anna Bogaçeva.
İyünniñ 25-nde Moskva vilâyetiniñ (Rusiye) Vlasiha şeerindeki Arbiy istinaf mahkemesi Yaltadaki «Hizb ut-Tahrir davasınıñ» altı mabüsiniñ ükmüni deñiştirmeyip qaldırdı.
Böylece, Rostov-na-Donu Cenübiy okrugınıñ arbiy mahkemesiniñ 2019 senesi qabul etken qararı deñişmedi. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
