Bugünki künde Yaltada üç evniñ mağazı suvda qala, 17 yol hocalığı obyekti, 22 cemaat yeri, 85 azbarnıñ fevqulâde vaziyet aqibetleri yoq etile, dep bildire Qırımnıñ Rusiye ükümetiniñ matbuat hızmeti.
«Tahminen 2170 tonna sel çıqarıldı, iş devam ete. Fevqulâde vaziyet aqibetleri yoq etile: Yaltada 17 yol hocalıq obyektinde, 22 cemaat yerinde, 85 azbarda, eki özende, Yaltanıñ eki rayonında (Cafer Seydamet soqağında, YUBŞ 27 soqağında) ve Yalta şeer okrugınıñ beş qasabasında. Zarar körgen vatandaşlarğa 33 mln rubleden çoq para berildi: 528 insanğa 10-ar biñ ruble, 165 insanğa 50-şer biñ ruble, 195 insanğa 100-er biñ ruble», – dep aytıla haberde.
Keriçte iyülniñ 10-u sabasına qadar maddiy zararğa qıymet kesken 10 komission gruppası çalıştı, 682 akt tizildi. 1124 vatandaşqa 10-ar biñ ruble; 136 vatandaşqa 50-şer biñ ruble, 822 vatandaşqa 100-er biñ ruble berildi. Umumen 100 mln rubleden çoq berildi. Şeerniñ cemaat naqliyatı yolcularnı adiy rejimde taşımaqta.
Hatırlatamız, cumaertesi künü, iyülniñ 26-nda, bir buçuq saat içinde Yaltada aman-aman bir aylıq yağanaq norması yağdı.
Qırımdaki Rusiye Fevqulâde vaziyetler nazirli Yaltada cumaertesi künü ola bilecek eñ az 17 suv basuvı aqqında malümat bar, dep bildirgen edi.
Yalta Rusiye memuriyetiniñ yolbaşçısı Yanina Pavlenko Facebook saifesinde bildirgenine köre, iyünniñ 26-nda saba selden zarar körgen Yaltada kene yağmurlar yağdı.
Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.
Rusiye prezidenti Vladimir Putin afat aqibetlerini yoq etmek içün Qırımğa «acele ve büyük» yardım köstermege emir etti.
İyülniñ 9-nda Yalta özenlerinde suv seviyesi kene köterildi, bazı evlerni tekrar suv bastı.
