Link açıqlığı

Saatnıñ esas haberi

Ve kene suv bastı. Bağçasaray rayonı ve Aqyarnıñ bir qısmı yañı afatqa nasıl dayandı


Albatta suv basuvınıñ aqibetleri, 2021 senesi iyülniñ 5-i
Albatta suv basuvınıñ aqibetleri, 2021 senesi iyülniñ 5-i

Qırımnı kene suv bastı. Küçlü sağanaqlar neticesinde bir qaç özen taşıp, yarımadanıñ bir qaç rayonında onlarnen evni bastı. Bu sefer afat köylerge zarar ketirdi. Bağçasaray rayonı ve Aqyarnıñ şimaliy ve şimaliy-şarqiy tarafındaki mesken yerler zarar kördi. Bundan ğayrı, Yaltanıñ bir qaç soqağını suv bastı – daa eki afta evelsi şeer aynı selden büyük zarar kördi. Bağçasaray rayonınıñ Albat (Kuybışevo) köyünde sel eki qadınnı alıp ketti. Biri hastahanege alındı, ekincisi ğayıp oldı. Daa soñra qurtarıcılar cesedini qomşu köyde taptı.

«Tünevinki sağanaqlarnı muzakere etemiz, ve Belbek vadiysinde on yıllarnen yaşağan insanlar böyle bir şey daa körmegenlerini ayta», – dep ayttı Qırım.Aqiqat mühbirine Belbek vadiysiniñ sakini, faal Tatyana Krılova.


Tabiat afeti vadiyde iyülniñ 4-nde oldı. Bağçasaray rayonınıñ köy sakinleri aytqanına köre, sağanaq «bir divar kibi» edi. Bir qaç saattan soñ Belbek ve Kokköz özenleri taşıp, yalılarındaki mesken yerlerini basıp başladı.

Eñ çoq Albat, Foti Sala (Golubinka) ve Aromat köyleri zarar kördi, dep ayta Krılova. Anda sel evlerni bastı, bir qaç on insan tahliye etildi. Tahliye etilgenler içün merkez vaqtınca Albat mektebinde açıldı.

Qırımnı kene suv bastı: suv taşqınlarınıñ sebebi ne? (video)
Bekleñiz, lütfen

No media source currently available

0:00 0:02:05 0:00

Sağanaqlar tek bu köylerge tesir etmedi. Küçük Süyren (Sadovoye), Bağatır (Bogatır), Kökköz (Sokolinoye) ve Ğavr (Plotinnoye) – sakinleri suv basqan soqaq, bostan ve azbarlar aqqında tarif etken mesken yerlerniñ bir qısmıdır.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.


Suv basqan evler, kesilgen ışıq ve afat alıp ketken ayat

Bir kün ögüne aman-aman bütün kün Belbek vadiysiniñ köylerinde elektrikler yoq edi, dep tarif ete Tatyana Krılova. Merkeziy suv kanalı olğan az köyniñ sakinleri suvsız qaldı. Kommunal hızmetler elektrik energiyasını tek iyülniñ 5-nde üylege yaqın berip oldı.

Marqur (Polâna) köyü yaqınlarında Su-Ahande özeni taştı, dep ayta yerli sakin Olga. Asılında «az körüngen irmaq» olğan özen taşması neticesinde bir çoq evniñ qorası tüşti, topraqnı ise «bayağı suv bastı», dep qoşa o.

Amma qomşularımız çoq zarar kördi. İnsanlar arasında vefat etkenler yoq, amma bir qorantanıñ asrağan bütün ayvanları öldi
Foti Sala köyüniñ sakini

«Evimiz, çoq şükür, özenge köre yüksekte qala ve bir qarar oldı, – dep ayta Qırım.Aqiqat mühbirine Foti Sala sakini Varvara Vasilyeva. – Amma qomşularımız çoq zarar kördi. İnsanlar arasında vefat etkenler yoq, amma bir qorantanıñ asrağan bütün ayvanları öldi. Tek bir sığırnı qorçalap olğanlar. Başqa qomşumıznıñ eki maşinası ketti. Öyle de tura anda».

Foti Saladan şimdilik tahliye etmeyler, dep qoşa Vasilyeva. Amma tünevinki adise-vaqialar sebebinden köyniñ ayatı «sanki toqtap qaldı». Maqale yazılğanda belli olğanına köre, Qırım Fevqulâde vaziyetler nazirliginiñ küçleri tek Albattan tahliye etti. Anda yerli mektep binasında vaqtınca merkez açıldı, 65-ten çoq insan tahliye etildi.

Sağanaqlar vaqtında Albatta insanlar tahliye etildi, Bağçasaray rayonı
Sağanaqlar vaqtında Albatta insanlar tahliye etildi, Bağçasaray rayonı

Tabiat afetiniñ eñ büyük faciası Albatta yaşağan qadınnıñ ölümi oldı. Fevqulâde vaziyetler nazirliginiñ malümatına köre, onı sel alıp ketti. Cesedini bir kün qıdırıp, Küçük Süyrende (Maloye Sadovoye) tapqanlar – Albattan eki kilometr mesafede yerleşken qomşu köy.

Aqyarğa tesir etti

Yağğan sağanaqlar Aqyarğa da tesir etti, amma, keçken sefer kibi, şeer ve etrafı Qırım yarımadasınıñ qomşu rayonlarından az zarar kördi.

Yerli akimiyet içün eñ ciddiy problem Bağa özeni oldı. O, taşıp, Aqyarnıñ cenübiy-şarqındaki Baydar vadiysinde Bağa (Novobobrovskoye) köyünde bir qaç evni bastı. Suv basuvı Skele (Rodnikovskoye) ve Urkusta (Peredovoye) köylerini birleştirgen yolda obalarnıñ peyda olmasına sebep oldı, dep ikâye ete vadiyniñ sakini Lenur Usmanov.

Bağçasaray rayonında sağanaq aqibetleri, Aromat köyü, 2021 senesi iyülniñ 4-ü
Bağçasaray rayonında sağanaq aqibetleri, Aromat köyü, 2021 senesi iyülniñ 4-ü

Özenge yıqılğan bir qaç terek mahsus inşaatnı qapattı ve suv basuvınıñ sebebi oldı, dep ayta Usmanov. Onıñ bildirgenine köre, Bağadaki vaziyet stabil qala, zarar körgen evlerniñ sakinlerini tahliye etmege acet qalmadı.

Bağa tez temizlendi, ve suv seviyesi eksilik başladı
Lenur Usmanov

«Şunı aytmaq kerek ki, bu sefer hızmetler keçken seferge köre daa yahşı çalıştı. Bağa tez temizlendi, ve suv seviyesi eksilik başladı, aynı vaqıtta taqımlar çıqıp, yolnı temizlep başladı», – dedi Usmanov Qırım.Aqiqat mühbirine.

Bir qaç saat içinde yol areketi ğayrıdan tiklendi.

Baydar vadiysiniñ köylerinden ğayrı, Aqyarnıñ şimalinde olğan meskün yerler zarar kördi. Laf Otarköy (Frontovoye), Dalneye, Acıköy (Pirogovka), Duvanköy (Verhnesadovoye) ve Qamışlı köyleri aqqında kete. Soñki üç köy tünevin kün devamında bütünley ya da qısmen ışıqsız qaldı. Bu köyler Aqyarnıñ Bağçasaray rayonı ile sıñırda Buluna, şunıñ içün olar da Belbek ve Kokköz özenleri taşqanından zarar kördi.

Qorqup beklev

Yerli sakinlerniñ aytqanına köre, Otarköyde Belbek özeni çalı-çırpı ve çöplük tolu, faqat yalılarnı pekitken inşaatlar dayandı, özen taşmadı.

Dalneye köyünde de keçken sene Qırım qurğaqlığınen küreşmek içün qurulğan Belbek suv alıcısında biraz suv taştı. Neticede suv alıcısında ast stantsiyalardan birini suv bastı, dep bildirdi suv basuvı aqibetlerinen küreş operativ ştabınıñ yolbaşçısı, Aqyarnıñ Rusiye valisiniñ muavini Nikolay Jigulin. Şimdi suv alıcısında qoyulğan donatma çalışmay, mütehassıslar ise onı quruta ve elektrik kelgen cihazlarnı tamir ete, dedi Jigulin.

Bağçasaray rayonında olğanlarğa baqılsa, bizimki – «bala gürültisi»
Aleksandr Alekseyenko

«Üyleden soñ «ketip başladıq, – dep ayta Qırım.Aqiqat mühbirine Duvanköy sakini Aleksandr Alekseyenko. – Amma, Bağçasaray rayonında olğanlarğa baqılsa, bizimki – «bala gürültisi». Tarlalarnı, bazı yollarnı suv bastı. Amma eñ esası – evler tura ve yaralanğanlar yoq».

Alekseyenkonıñ aytqanına köre, şimdi suv seviyesi eksildi.

Tatyana Krılovanıñ aytqanına köre, Belbek vadiysine kirgen esas özenler temiz edi. Şunıñ içün şimdiki sellerde birini qabaatlamaq zor, dep tüşüne faal. Onıñ fikirince, Bağçasaray rayonınıñ bir qaç rayonında olğan şeyler felâket sayılmalı. Oña dayanmaq kerek.

«Sinoptikler gece kene yağmur yağacaq, dep ayta. Yaltadaki tanışlarımız da ayta, Ay-Petride büyük qara bulutlar toplandı, şunıñ içün bugünki geceni qorqup bekleymiz», – dep ayta Varvara Vasilyeva.

Bunıñnen beraber, bazarertesi aqşamı Belbek vadiysiniñ sakinleri suv basuvınıñ aqibetlerini yoq etken qurtarıcılarğa yardım etmek içün göñüllilerni toplay.

XS
SM
MD
LG