Yaltanıñ rusiyeli mahkemesi "İyegova şaatları"nıñ azası Artöm Gerasimovnı 400 biñ rublelik para cezasına üküm etti, dep bildire "Qırım birdemligi" cemiyet birleşmesi ve "Qırım Protsesi" haber menbaası haber ete.
Onı ekstremist teşkilâtınıñ faaliyetiniñ teşkil etüvinde qabaatlı tanıdılar.
Bir kün evel qabaatlav tarafı Gerasimov içün 6,5 yıllıq apis cezasını istedi.
"Bir taraftan men adaletli ükümge işana edim ve meni qabaatsız tanıycaqlarını bekley edim. Amma, buña baqmadan, mahkeme üküm ete bilecek kibi ağır cezanı saylamağanı da yahşı. Aqçanen qutuldım", - yaza Gerasimovnıñ sözlerinden "Qırım protsessi".
Daa evel Rusiyeniñ nezaretinde olğan Canköy rayon mahkemesi yerli sakin Sergey Filatovnı ceza koloniyasında cezası ile 6 yıl azatlıqtan marum etti.
«Memorial» aq qorçalayıcı merkeziniñ malümatına köre, qomşu Rusiyede keçken sene aprel ayından başlap mezkür diniy teşkilâtnıñ 39 tarafdarı uquqiy ceetten taqip etile. 2018 senesi avgust ayında «Memorial» aq qorçalayıcı merkezi, ekstremizmde qabaatlanğan «İyegova şaatları» diniy teşkilâtınıñ 29 tarafdarını siyasiy mabüs olaraq tanıp, olarnı acele azat etmege çağırdı.
