Yalta jurnalisti Yevgeniy Gayvoronskiy, “Primeçaniya” haber saytı ondan Vladimir Putin tenqidi içün ayırıldı, dep tüşüne. Bu aqta o martnıñ 25-inde Qırım.Aqiqatqa ikaye etti.
Onıñ aytqanına köre, “o matbuat, bütün yaman ve yaramazlıqnıñ sebebi Kremlde olğanını ve Qırımnıñ ilhaqını qabul etmege cesüriyeti yetmey”.
“Men evelde de aqiqatnı ayta edim, amma, belki de, bütün inciliklerni bilmegendirim. Şimdi ise men olğanı kibi yazam. Men “Primeçaniya”nı ürmet etem. Bayağı meraqlı maqale basılğan edi, muarriri pek küçlü, yüksek seviyeli.. Amma men olarnen iş tutqance, Putinge qarşı bayağı tenqit yazğan edim ve maña gece bile “Sen neler yapasıñ? Epimizge zarar tiydireceñ” dep telefon ete ediler. İşbirligimizniñ red etmesi de - menden ayırılmaq ıntıluvıdır”, - dep saya Gayvoronskiy.
Yaltada Rusiye uquq qoruyıcıları martnıñ 6-nda «Primeçaniya» Aqyar neşiri ile iş tutqan jurnalist ve bloger Yevgeniy Gayvoronskiyniñ yaşağan yerini tintti. Bu aqta Rusiye tarafdarı cemaatçısı İlya Bolşedvorov Qırım.Aqiqatqa haber etti.
Yevgeniy Gayvoronskiy Donetskte dünyağa keldi, yerli aliy oquv yurtunıñ jurnalistika bölüginde oqudı ve şeerde jurnalist olıp çalıştı. Yaltada bir qaç yıl yaşay. Daa evel «Narodnoye yedinstvo» yerli Rusiye tarafdarı cemaat teşkilâtınıñ matbuat kâtibi olıp çalışqan edi. Onıñ faalleri 2014 senesi mart ayında yarımadanıñ Rusiyege qoşuluvı aqqında «referendum» keçirilmesi içün imza toplağan edi. Soñra Gayvoronskiy «Yevraziyskiy jurnal» Rusiye tarafdarı mecmuasınıñ muarriri oldı. Bu vazifede Yalta yalısında kösterilgen Rusiye prezidenti Vladimir Putinniñ er yılki beyanatı vaqtında onı maqtağan edi. Bir müddet Gayvoronskiy «Komsomolskaya pravda» Rusiye neşiriniñ Qırım muarririyetinde mühbir olıp çalıştı. İşten boşatılğan soñ ise yerli akimiyetni tenqit etkeni içün muhalifet dep adlandırılğan «Primeçaniya» Aqyar neşiri ile işbirligi yapmağa başladı. Bazı maqaleler içün jurnalist Yalta akimiyetini de raatsızlay. Ara-sıra onı şeer şurasınıñ sessiyasına yibermeyler.
2018 senesi fevral ayınıñ başında qırımlı jurnalist Yevgeniy Gayvoronskiy onı Yalta merkezinde köteklegenler, dep bildirgen edi. Onıñ aytqanına köre, o künü oquyıcı ile körüşip, şeer parkında olacaq tamir işlerini muzakere etecek edi. Jurnalist bu ücümni Yalta iş adamı Dmitriy Tükayev sımarladı, dep tüşüne. Gayvoronskiy onıñ «işine ve qanun bozuvlarına» bir qaç jurnalist tahqiqatını bağışlağan edi. Tükayev bu ikâyede onıñ adı keçkeni içün Gayvoronskiyge qarşı namus, itibar ve iş reputatsiyasını qorçalamaq içün dava açtırğanını bildirdi. Gayvoronskiy olıp keçken adiseni özü azırlağanında qabaatlandı.
