Link açıqlığı

Saatnıñ esas haberi

Rusiye uquq qoruyıcıları yaltalı jurnalist Gayvoronskiyniñ evinde tintüv keçirdi – faal


Yevgeniy Gayvoronskiy
Yevgeniy Gayvoronskiy

Yaltada Rusiye uquq qoruyıcıları martnıñ 6-nda «Primeçaniya» Aqyar neşiri ile iş tutqan jurnalist ve bloger Yevgeniy Gayvoronskiyniñ yaşağan yerini tintti. Bu aqta Rusiye tarafdarı cemaatçısı İlya Bolşedvorov Qırım.Aqiqatqa haber etti.

«Tintüv oldı dep bilem. Kiyev rayon mahkemesiniñ qararı bar. Vesiqaları, elektron tehnikası, cep telefonı, bilgisayarı tutıp alındı. Malümat taşığan er şey. Al-azırda azatlıqta buluna. Onı tutmadılar. Narkotik ve içki tapmaq içün tibbiy teşkerüvge alıp ketken ediler. Bir şey tapmadılar», – dep tarif etti Bolşedvorov.

Onıñ aytqanına köre, Gayvoronskiy «politsiya hadimleriniñ qanunsız areketlerini» Rusiye Tahqiqat komitetine ve Rusiye prokuraturasına şikâyet etti.

Bölşedvorov Gayvoronskiyniñ evinde keçirilgen tintüvniñ «resmiy sebeplerini» bilmey.

Qırım.Aqiqat Gayvoronskiy ile bağlanmağa tırışa, amma o, şimdilik cevap bermey. Rusiye uquq qoruyıcıları işbu tintüv malümatlarını izaatlamay.

Yevgeniy Gayvoronskiy Donetskte dünyağa keldi, yerli aliy oquv yurtunıñ jurnalistika bölüginde oqudı ve şeerde jurnalist olıp çalıştı. Yaltada bir qaç yıl yaşay. Daa evel «Narodnoye yedinstvo» yerli Rusiye tarafdarı cemaat teşkilâtınıñ matbuat kâtibi olıp çalışqan edi. Onıñ faalleri 2014 senesi mart ayında yarımadanıñ Rusiyege qoşuluvı aqqında «referendum» keçirilmesi içün imza toplağan edi. Soñra Gayvoronskiy «Yevraziyskiy jurnal» Rusiye tarafdarı mecmuasınıñ muarriri oldı. Bu vazifede Yalta yalısında kösterilgen Rusiye prezidenti Vladimir Putinniñ er yılki beyanatı vaqtında onı maqtağan edi. Bir müddet Gayvoronskiy «Komsomolskaya pravda» Rusiye neşiriniñ Qırım muarririyetinde mühbir olıp çalıştı. İşten boşatılğan soñ ise yerli akimiyetni tenqit etkeni içün muhalifet dep adlandırılğan «Primeçaniya» Aqyar neşiri ile işbirligi yapmağa başladı. Bazı maqaleler içün jurnalist Yalta akimiyetini de raatsızlay. Ara-sıra onı şeer şurasınıñ sessiyasına yibermeyler.

2018 senesi fevral ayınıñ başında qırımlı jurnalist Yevgeniy Gayvoronskiy onı Yalta merkezinde köteklegenler, dep bildirgen edi. Onıñ aytqanına köre, o künü oquyıcı ile körüşip, şeer parkında olacaq tamir işlerini muzakere etecek edi. Jurnalist bu ücümni Yalta iş adamı Dmitriy Tükayev sımarladı, dep tüşüne. Gayvoronskiy onıñ «işine ve qanun bozuvlarına» bir qaç jurnalist tahqiqatını bağışlağan edi. Tükayev bu ikâyede onıñ adı keçkeni içün Gayvoronskiyge qarşı namus, itibar ve iş reputatsiyasını qorçalamaq içün dava açtırğanını bildirdi. Gayvoronskiy olıp keçken adiseni özü azırlağanında qabaatlandı.

XS
SM
MD
LG