Rusiye nezaretindeki Yalta akimiyeti, qanunsız çalışqan otellerniñ cedveliniñ tizip bitirgeni aqqında bildire.
"Bazı yerleşüv bazaları yüksek azırlıq rejiminiñ ilân etilmesinden evel qanunsız çalıştı, bundan sebep, vergi hızmeti ve şeer memuriyeti böyle obyektlerni tayin etmek içün keñiş işni teskerüvni becerdi. Qanunnıñ bozğanlarnıñ bazası tizildi, bundan soñ cedvel azırlanacaq", - denile şeer akimiyetiniñ beyanatında.
Qayd etile ki, "qanunnı bozıp şimdi raatlanıcılarnı qabul etkenler cezalanacaq".
"Bu cedvel sıñırlayıcı tedbirlerniñ toqtatılmasından soñ da bizge yardım eter. O, kurort mevsiminde vesiqasız çalışqanlarğa qarşı küreş aleti olacaq", - yaza Yalta başı İvan İmgruntnıñ sözlerinden memuriyetniñ matbuat hızmeti.
Daa evel Rusiye kontrolindeki Qırım yolbaşçısı Sergey Aksenov, koronavirus telükesi sebebinden Qırımnıñ Rusiye medeniyet nazirligine aprel ayında turist aqınını arttırmasından vazgeçmege emir etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
