Kreml nezaretindeki Yalta akimiyeti, Ay Petride reyd teşkerüvi vaqtında, "ruhsetsiz alış-veriş ve ticaret"ni qayd etti. Bunı rusiyeli Yalta akimiyetiniñ matbuat hızmeti bildirmekte.
"Yalta memuriyetiniñ istimal bazarı ve hızmetler idaresiniñ hadimleri ve Ekologiya Nazirliginiñ hadimlerinen bereberlikte, Ay Petride ruhsetsiz alış-verişni qayd etip, kestirdik, bundan ğayrı – ruhsetsiz kvadratsikl ve at kezintilerini de", – bildirdiler matbuat hızmetinde.
Bundan ğayrı, teşkerüvniñ bütün aktlarını prokuratura, politsiya ve başqa müessiselerge yolladılar.
Satıcılar ve iş adamlarınıñ bu hususta tefsirleri şimdilik yoq.
Mayıs ayında Ay Petri yaylasında alat yolunıñ yuqarı stantsiyası yanında alış-veriş noqtalrını yıqtılar.
İlhaq etilgen Qırımda, Aqyar ve Keriçte ruhsetsiz ticariy inşaatnen küreşeler – tükânlar, kafeler, alış-veriş noqtaları ve pansionatlarnı yıqalar.
