Rusiye nezaretindeki Yalta memuriyetiniñ qurulışında deñişmeler oldı, olarğa köre, şeer başınıñ qabarcılıqqa qarşı cinayetlerge qarşı yardımcıları bölügi yaratıldı. Bundan ğayrı şeer memuriyetiniñ başınıñ matbuat kâtibi vazifesi peyda oldı. Bu deñişmelerni fevralniñ 12-sinde Yalta şeer şurası qabul etti, dep bildirile şeer memuriyetiniñ saytında.
"Kurort ve turizm boyunca bölük yerine departament yaratılacaq, sanayı, naqliyat ve alâqa bölüginiñ adını naqliyat ve alâqa bölügine deñiştirecekler", - dedi sessiyada Yalta başı İvan Imgrunt.
Daa evel Yaltada kurort ve turizm boyunca bölükniñ yañı reberi tayinlengeni aqqında bildirildi. Bu vazifeni Krasnodar ülkesinden Maksim Drovetskiy becere.
Keçken yıl mayıs ayında Yalta şeeriniñ rusiyeli şurası İvan İmrguntnı Yalta memuriyet başınıñ muavini rutbesine tayinledi.
Şeer memuriyetiniñ başı Aleksey Çelpanov bildirgeni kibi, İmgrunt sekiz yıl Rusiye prokuraturasında çalıştı ve 17 yıl devamında qomşu Rusiyede Krasnodar ülkesinde idareciliknen oğraştı.
Çelpanov, namzetniñ yuridik tasili bar olğanını da qayd etti.
İmgrunt özü şeer şurasınıñ toplaşuvında, 2018 senesi fevralde oña qarşı cinaiy dava açılğanını aytıp berdi, amma 2018 senesi dekabrde cinayetçilik olmağanından sebep o qapatıldı.
