Rusiyeniñ Rostov-na-Donu şeerindeki Cenübiy okrugınıñ arbiy mahkemesi Qırımdaki «Hizb ut-Tahrir davasınıñ» mabüsi Yaşar Şihametovnıñ apis müddetini üç ayğa uzattı, dep bildire «Qırım birdemligi» cemaat birleşmesi.
«Oturışuvda prokuror sıñırlav tedbirini üç ayğa uzatuv meselesini uzattı. Mahkeme devlet qabaatlayıcısınıñ muracaatını qanaatlendirip, mabüsniñ qızğın duyğularına sebep oldı. Diñlevlerde qabaatlanğan kişi mahkemede mahkeme kollegiyası ve prokurornıñ çekilmesi aqqında eki muracaat berdi, amma red cevabını aldı. Narazılıq olaraq Yaşar Şihametov divar ve «akvariumdaki» skemlege yumruqnen urdı, böylece devlet qabaatlayıcısını diñlemege istemegenini bildirdi», – dep aytıla haberde.
Mahkeme qarar çıqarğanda mabüsniñ sağlıq ve qoranta vaziyetine emiyet bermeyip, Yaşar Şihametovnı 2022 senesi aprelniñ 26-na qadar uzattı.
Ukraina ombudsmanı Lüdmila Denisova Qırımdaki «Hizb ut-Tahrir davasınıñ» mabüsi Yaşar Şihametovnıñ sağlıq vaziyeti fenalaştı, dep bildirgen edi. Onıñ aytqanına köre, «yürek, qara ciger ve aşqazan problemleri ağırlaştı».
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
