2014 yılda Qırım Rusiye tarafından işğal etilgen vaqıttan berli 120 biñden ziyade Qırım sakini Herson vilâyetinde biometrik pasortnı resmiyleştirdi. Bu aqta Qırım. Aqiqatqa Herson vilâyetinde Ukraina Devlet köç hızmetiniñ matbuat kâtibi Yuliya Galitskaya haber etti.
“Qırım yarımadası işğal etilgen vaqıttan berli Qırım sakinleri 121 589 biometrik pasport vesiqası resmiyleştirdi… Olarnıñ arasında 98 139 çetel pasport ve 23 410 id-karta”, – aytıp berdi Galitskaya.
Onıñ bildirgenine köre, Qırım sakinleri pasport vesiqalarını resmiyleştirmek içün Ukraina Devlet köç hızmetiniñ er angi bölügine muracaat ete bile.
Evel Qırım. Aqiqat haber etkeni kibi, Qırım işğal etilgen vaqıttan beş yıl içinde Herson vilâyetiniñ köç hızmetlerine çetel pasortnı almaq içün 78 395 biñ Qırım sakini muracaat etken.
Qırım sakinleri vaqtı keçken ukrain pasportınen Herson vilâyeti ile memuriy sıñırdan maniasız keçe bileler. Bu aqta Qırım. Aqiqatqa Ukraina Devlet Sıñırı hızmetiniñ Herson sıñır bölüginiñ matbuat kâtibi İvan Şevtsov aytıp berdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
