Qırım sakinleri vaqtı keçken ukrain pasportınen Herson vilâyeti ile memuriy sıñırdan maniasız keçe bileler. Bu aqta Qırım. Aqiqatqa Ukraina Devlet Sıñırı hızmetiniñ Herson sıñır bölüginiñ matbuat kâtibi İvan Şevtsov aytıp berdi.
“Bir vatandaşnıñ vaqtı keçken pasportı olsa – vesiqasını deñiştirip yañısı almaq içün Ukraina qıtasına kete bile… Devlet köç hızmetinde mahsus blank berile. Anda, olarnıñ pasport vesiqası azırlanğanı aqqında yazıla… Bu blankqa esaslanıp olar memuriy sıñırdan keçip olalar”, – añlattı İvan Şevtsov.
Ukraina Yuqarı Radasınıñ insan aqları vekâletlisi Lüdmila Denisova Qırım. Aqiqatqa tasdıqladı: ukrain tarafı Qırım sakinlerini vaqtı keçken pasport ile memuriy sıñırdan keçire.
“Vaqtı keçken vesiqa ile Ukrainağa kirişni kimse yasaq etmez… Amma türlü allar ola bile, ne içün 45 yaşına kelip alâ daa yañı fotosı yoq… Kirmek kerek - yibererler”, – dedi ukrain ombusmeni.
2014 senesi Qırım Rusiye tarafından işğal etilgen soñ Ukraina qıtası ve yarımada arasında şekliy olaraq sıñır peyda oldı, amma asılında – kerçek. Herson vilâyetinde Qırım ile memuriy sıñırda üç kiriş/çıqış yoqlav keçiti çalışa – “Qalançaq”, “Çonğar”, “Çaplınka”.
