Qırımnıñ rusiyeli akimiyeti "Tavrida" trassasında yük maşnalarnıñ yürmesini yasaqlağanına baqmadan, olar bu yolnıñ kimer qısımlarında yürmege devam ete. Yasaqlayıcı işaretler Qarasuvbazar (Belogorsk) şeeriniñ burulışı ögünde qoyulğan. Olarğa köre, yük maşnalarına "Tavrida" trassasında yürmege yasaq, olar eski Aqmescit-Kefe yolunda yürmeli, dep bildire Qırım.Aqiqat mühbiri.
İyül 16-sında ilhaq etilgen Qırımnıñ Maşna yolları hızmetiniñ başı Aleksandr Nefedov, kütlesi 12 tonnadan çoqça olğan yük maşnalarnıñ "Tavrida" trassasında yürmesini sıñırlamaq planları aqqında bildirdi.
Bundan evel "Tavrida" trassasında Qırımnıñ Yedi Quyu (Leninskiy) rayonınıñ Dere Salın (Çistopolye) köyü burulışı yanında kene bir yol qazası oldı - Yamaha patapatı ve yük maşnası çatıştı. Yaralanğanlar bar.
Yañı "Tavrida" trassasına, sıq-sıq olğan qazalar içün "ölü yolu" deyler.
Qırımlı qurtarıcılarnıñ bildirgenine köre, Qırımda ciddiy yol qazalarınıñ sayısı arttı. Qırımda 2019 senesiniñ birinci üç ayında keçken yılğa baqqanda bir buçuq qat ziyade aydavcı mesüliyetke çekildi.
