Rusiye kontrolindeki Aqmescit rayon mahkemesinde iyülniñ 15-nde Rusiye FSBsi tarafından Qırımda tutulğan Azatlıq Radiosınıñ frilanseri (Qırım.Aqiqat leyhası) Vladislav Yesipenkoğa qarşı cinaiy davanıñ oturışuvı olıp keçti.
Qırım.Aqiqat mühbiri bildirgenine köre, bu oturışuvda Rusiye prokurorı qabaatlav hulâsasını seslendirdi. Vladislav Yesipenko Rusiye Ceza kodeksiniñ 223.1 maddesine istinaden (patlayıcı maddelerni qanunsız yapuv, ğayrıdan yapuv ya da patlayıcı cihazlarnı tamir etüv) ve Rusiye Ceza kodeksiniñ 222.1 maddesine istinaden (silâ, onıñ esas parçalarını qanunsız aluv, berüv, satuv, saqlav ya da taşuv) qabaatlana. Eki maddeniñ cezası 12 yıl apis cezasına qadar ola bile. Eki madde boyunca eñ büyük ceza 18 yıl apis cezası ola bile. Qabaatlav hulâsasında casuslıq ve Ukraina istihbaratı içün iş qabaatlavı yoq.
Qabaatlav hulâsası seslendirilgen soñ Yesipenko qabaatını tanımay, dep bildirdi.
Bundan ğayrı, oturışuvda advokat Dmitriy Dinze Vladislav Yesipenkonıñ ömür arqadaşı Yekaterina Yesipenko ile imzalanğan añlaşmanı mahkemege berdi. Bunıñ esasında o, qabaatlanğannıñ menfaatlarını temsil etecek.
Bundan soñ Dinze dava malümatlarını incelemek içün muracaat berdi. Oturışuvda teneffüs ilân etildi.
Nevbetteki mahkeme sentâbrniñ 6-nda olacaq.
Serbest Avropa Radiosı/Azatlıq Radiosınıñ prezidenti Jamie Fly Rusiye kontrolindeki Aqmescit rayon mahkemesinde Vladislav Yesipenkoğa seslendirilgen qabaatlav hulâsasını «adaletni mısqıllav» dep adlandırdı.
Vladislav Yesipenko mahkeme binasından SİZOğa alıp ketirilgende esini coyğan eken.
Yuqarı Rada deputatı, Ukrainanıñ PACE eyyetiniñ azası Rustem Umerov sessiya zalınıñ minberinden çıqışta bulunıp, Qırım.Aqiqat frilanseri Vladislav Yesipenkonı ve Qırım ve Rusiyedeki bütün ukrainalı siyasiy mabüslerni azat etmege çağırdı.
İyülniñ 6-nda Kyivniñ merkeziy meydanında Qırımdaki Rusiye mahkemesi tarafından apis cezası dekabrniñ 18-ne qadar uzatılğan Vladislav Yesipenkoğa qol tutuv aktsiyası ötkerildi.
Serbest Avropa Radiosı/Azatlıq Radiosınıñ prezidenti Jamie Fly Yesipenkonı acele azat etmege çağırdı. ABD Devlet departamenti Azatlıq Radiosınıñ freelanceri oğrağan vaziyet sebebinden qasevetlengenini bildirdi.
Apiske alınğan frilanserniñ apayı Yekaterika Yesipenko Vladislav daa bir maddege istinaden qabaatlana, dep bildirdi – Rusiye Ceza kodeksiniñ 222-nci maddesi (Silâ, esas parçalarını qanunsız aluv, berüv, satuv, saqlav ya da taşuv). Bu maddeniñ sanktsiyaları 5 yıldan 12 yılğa qadar azatlıqtan marum etüvni belgiley.
Aq qorçalayıcılarnıñ aytqanına köre, Qırımda Vladislav Yesipenko Rusiye Ceza kodeksiniñ 223.1 maddesine istinaden (Patlayıcı maddelerni qanunsız azırlav, qanunsız yapuv, ğayrıdan yapuv ya da patlayıcı cihazlarnı tamir etüv) qabaatlanğan edi. Bu maddege köre 8 yıldan 12 yılğa qadar apis cezası berile bile.
Matbuat serbestligi kününde Yekaterina Yesipenko aqayını işkencege oğratıp, şaatlıq etmege zorlağanlar, dep bildirdi.
Vladislav Yesipenko davası
Vladislav Yesipenko – Azatlıq Radiosınıñ (Qırım.Aqiqat leyhası) ştattan tış jurnalisti (frilanser), içtimaiy ve ekologik meselelerni aydınlatqan, qırımlılarnıñ soravlarını çıqarğan edi. 2021 senesi martnıñ 10-nda Qırımda Rusiye FSBsiniñ hadimleri tarafından tutuldı. «Ukraina mahsus hızmetleriniñ menfaatları içün» malümat toplağanında ve maşinasında «elnen yapılğan patlayıcı cihaznı» saqlağanında qabaatlandı.
27 kün devamında Yesipenkonı mustaqil advokatlarnen körüştirmediler. Amma «Krım 24» Rusiye devlet telekanalı intervyüsını kösterdi: kanal saytında derc etilgen videoda Vladislav Yesipenko yarımadada Qırım.Aqiqat leyhası içün video çıqarğanını tasdıqlap, çıqarılğanlarnı Ukraina mahsus hızmetlerine de bergenini ayttı.
Mustaqil advokat kirsetilgen Aqmescitteki mahkeme oturışuvında Vladislav Yesipenko Rusiye mahsus hızmetleri tarafından oğratılğan işkence aqqında bildirdi. Anda Yesipenko tayin etilgen advokat Violetta Sineglazovadan vazgeçti. Mahkeme Yesipenkonı 2021 senesi mayısnıñ 11-ne qadar apiste qaldırdı.
Advokat Aleksey Ladinniñ aytqanına köre, Yesipenko mahkemede işkence aqqında aytqan soñ, Rusiye FSBsiniñ hadimleri «onı öldürirler», dep qorquzdı.
Ukraina tış istihbarat hızmeti Qırım.Aqiqatqa cevap berip, FSBniñ Vladislav Yesipenkonıñ Ukraina mahsus hızmetlerinen yapqan işbirligi aqqında "provokatsiyasını izaatlamay», dep bildirdi. Qırım Muhtar Cumhuriyetiniñ prokuraturası Qırımda Vladislav Yesipenkonıñ tutıp apiske alınmasınen bağlı cinaiy tahqiqat başlattı.
Rusiye quvetçileri Vladislav Yesipenkoğa qarşı tahqiqat tedbirleri aqqında resmiy malümat bermey.
Ukraina Tış işler nazirligi, Ukraina ombudsmanı, Avropa ve Halqara jurnalistler federatsiyası Vladislav Yesipenkonı acele azat etmege çağırdı.
Serbest Avropa Radiosı/Azatlıq Radiosınıñ prezidenti Jamie Fly Yesipenkonı acele azat etmege çağırıp, SAR/AR Qırımda tutulğan Qırım.Aqiqat frilanseri bildirgen işkencege açuvlana, dep bildirdi.
