Viyana Prokuror ofisi «Coop Himmelb (l) au» Avstriya mimarlıq bürosınıñ Rusiye tarafından işğal etilgen Aqyarda opera teatriniñ quruluvında iştirak etmesini tahqiq etmeycek, dep haber etti Avstriya TİN Azatlıq Radiosına.
İdarede aytıp bergenlerine köre, Devlet qoruv ve terrorcılıqqa qarşı turuv federal agentligi (BVT) büronıñ işğal etilgen Qırımda faaliyetini tahqiq etmege vazife alğan. Amma soñra Viyana Prokuror ofisi şirket faaliyetiniñ ilk tahqiq etüvniñ başlanuvına qarşı çıqqan.
Evel Ukraina, Aqyardaki opera teatriniñ leyhasını azırlav içün «Coop Himmelb (l) au» Avstriya mimarlıq bürosı ve onıñ reberligine qarşı sanktsiyalar qoyuv protsedurasını başladı, dep haber etilgen edi.
Evel Avstriya, Rusiye tarafından Qırımnıñ qanunsız işğalini takbih etmege ve tanımama siyasetini, şu cümleden sanktsiyalarnı da desteklemege devam ete. Amma Avstriyanıñ Avropa, integratsiya ve tış işler federal nazirligi, AB-niñ yarımadanıñ işğaline qarşı sanktsiyaları "yalıñız bazı iqtisadiy faaliyentni yasaq ete, amma hususiy şirketlerniñ Qırım ile bütün iqtisadiy münsebetelrini degil", dep bildirdi.
Avstriyadaki Ukraina elçisi Oleksandr Şçerbak, mimarlıq bürosınıñ müdiri Volf Priksqa adını lekelememek içün qurucılıqta iştirak etmemege çağırğan, amma o red etken.
