«Fikir» rubrikası, mahsus Qırım.Aqiqat içün
Moskva civarındaki Krasnogorskta terror ücümi aman-aman ilk daqqalarından gizli izaaatlarnen toldı. Bir çoq kişi emin ki, terrorda Kremlniñ menfaatları ola bile – seferberlikni ve Ukrayınağa qarşı Rusiye cenkini devam ettirmek içün. Vladimir Putin ve uquq qoruyıcıları ise teraktta Ukrayına ve ğarpnıñ mahsus hızmetleriniñ izi bar ola bile, dep ayta – amma bu sefer de bir delil yoq.
Amma bir ihtimal daa bar, vaziyet bayağı adiy ola bile – biz tecribesizlik ve olmağan resurs şaatları oldıq. Terrornen küreşmek içün küçlü ve tecribeli mahsus hızmetler kerek. Rusiye uquq qoruyıcıları soñki yılları ne yapa?
Qırımda bile qaç insan mabüs oldı hatırlayıq – birileri ekstremizmde, digerleri terrorizmde qabaatlandı
Esas energiyalarını farqlı fikir ve uydurılğan telükelernen küreşmek içün sarf eteler. Qırımda bile qaç insan mabüs oldı hatırlayıq – birileri ekstremizmde, digerleri terrorizmde qabaatlandı. Ya bu insanlar arasında qaç kişi kerçek terrorist ve ekstremist ola?
Ebet, bu ritorik bir sual. Eminim, tutulğanlardan iç birisi terror ücümini azırlamağan edi. «Ekstremizm» ise sıq-sıq yarımadada işğalci rejimniñ areketleri aqqında doğru malümattan ibaret edi. Amma bu Qırım sakinleri ya da Rusiye vatandaşlarınıñ ayatları içün telükeli degildir, doğrumı?
Böyle mahsus hızmetniñ vazifesi nedir – begenmegenlerni tapıp cezalandırmaq
Mence, uydurılğan bir telükenen küreş er angi mahsus hızmetni akimiyetniñ menfaatlarına hızmet etken adiy bir siyasiy poliske çevire. Böyle mahsus hızmetniñ vazifesi nedir – begenmegenlerni tapıp cezalandırmaq. Ğaliba, FSBge kerçek terroristler kerekmey, çünki rejimniñ qabarcı olğanını aytmay, açıq mektüp imzalamay, bir kişilik narazılıq aktsiyalarına çıqmay ve Navalnıynıñ cenazelerine barmay. Olar tek terakt azırlaylar: silâ alıp, icracılarnı tapalar, kontsert salonını zapt etüv planını azırlaylar... Bular kimge meraqlı olur ki?
Uquq qoruyıcı qurulışlar Kremlniñ siyasiy hızmetçisi oldı
Şunıñ içün Krasnogorskta olğanlarnıñ Vladimir Putinniñ siyaset neticeleri olğanından eminim, çünki uquq qoruyıcı qurulışlar bütünley Kremlniñ siyasiy hızmetçisi oldı. Buña Ukrayına ile cenkte toplavnı da qoşayıq – bu da Putin istilâsınıñ neticesi ola. Ğarbiy mahsus hızmetlernen işbirligi yapmaylar ve olarnıñ malümatına inanmaylar. Ve böylece Rusiyeniñ terror telükesi ögündeki zayıflıq formulasını çıqarayıq.
Bir gizlilik kerekmey. Eminim, bu bir ahmaqlıq, iş bilmeme ve zayıflıq. «İslâm devletinden» radikal olğanlar bunı qullanmağa istedi – uydurılğan degil, kerçek terroristler. Amma Putin bundan soñ da terrorist ve öz mahsus hızmetlerini degil, Ukrayına ve Ğarpnı qabaatlamağa devam ete. Yani Rusiyede yañı terror ücümleri içün obyektiv şaraitler azırlay.
Ve mında gizlilikke baqa bilemiz. Rusiye prezidenti israr ve azırlıqnen böyle şaraitler yapqan olsa, belki, özü de «İslâm devletinden» daa çoq terakt istey?
Vitaliy Portnikov – jurnalist ve siyasiy izaatçı, Azatlıq Radiosı ve Qırım.Aqiqat müellifi
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.