«Fikir» rubrikası, mahsus Qırım.Aqiqat içün
Soñki künlerniñ esas suali Rusiye Qara deñiz flotunıñ komandiri admiral Viktor Sokolovnıñ ölip ölmegeni degil. Esas sual Rusiye Qara deñiz flotunıñ özüniñ normal şekilde işlep olacaq vaziyette olıp olmağanıdır.
Onıñ yeñilmezligi aqqında mif Rusiye-Ukrayina cenki zamanı - "Moskva" kreyseriniñ yoq etilmesinden başlap işğal etilgen Aqyardaki Qara deñiz flotunıñ ştab kvartirasına darbege qadar bayağı stabilsizdir. Flot gemilerini ğayıp ete, onıñ komandanlığı ise raketa ücümlerinden saqlanmaq mecbur. Flot idare etilmesiniñ logistikası özü bozuq. Cenkni başlağanda Putin adiseler böyle çevirilecegini beklemedi.
Aksine, Qara deñiz flotuna büyük ümütler bar edi: raketa ücümleri, limanlarnı yoq etüv, qara deñizde vaziyetni turğunsızlaştıruv.
Elbette flotnıñ oña berilgen vazifelerni baş etip olamağanını aytmam. Ava telükesi signallarını eşitemiz, Rusiye Ukrayinanıñ liman infraterkibini yoq etkenini köremiz.
Rusiye Qara deñiz hahire añlaşmasından çıqqan soñ zahireniñ miqdarı bayağı azlaştı. Bu em deñiz, em özen limanlarına aittir. Bundan ğayrı bu vaziyet Ukrayina ve qomşu memleketler, ilk evelâ Ukrayina ve Poloniya arasında, misli olmağan buhranğa sebep oldı.
Onıñ gemileri suv altı dronlardan, komandanlığı ise raketa darbelerinden qorqa
Eminim ki, Qara deñiz flotu olmasa edi, böyle bir şey olmaz edi, ya da eñ azından böyle mıqyasta olmaz edi. Amma onıñ çareleri kün-künden eksile. Elbette şimdilik söz lokal imkânlar aqqındadır. Amma bu da yeterlidir, flot yarı dağıluv alındadır. Onıñ gemileri suv altı dronlardan, komandanlığı ise raketa darbelerinden qorqa. Bular Qırım işğaliniñ ilk künlerinde ve Ukrayinanıñ deñi blokadası vaqtında körgenimiz korsanlar artıq degil. Bular darbelerden saqlanmaq mecbur olğan korsanlardır.
Tam bu sebepten, ekspertlerniñ fikrince, Qara deñiz flotunıñ infraterkibine darbe endirilmesi devam etmek kerek. Aqyar işğalciler içün telükesiz yer olmamaq kerek. Yahşı ki, Ukrayinanıñ ortaqları buña qarşı degil.
Böyle sistematik ücümler neticesinde RF Qara deñiz flotunıñ gemilerine ve reberligine Novorossiyskke avuşmaq kerek olsa, menimce, bu artıq başqa flot olacaq.
Qırımdaki Qara deñiz flotu globaldir. Novorossiyskteki flot lokaldir
Tam bu sebepten Rusiye reberligi Aqyardaki flotnı saqlap qalmaq içün elinden kelgenini yaptı. Yani sebep, yalıñız Aqyar ve Qırımnıñ işğal etilmesinde vazifesine eda etmek degil edi. Qırımdaki Qara deñiz flotu globaldir. Novorossiyskteki flot lokaldir. Ve Moskvada da bunı bileler.
Bu sebepten Ukrayinada Rusiye flotunıñ Novorossiyskke ketmesi ne qadar müim olğanını pek yahşı añlaylar. Aqyarğa ise Ukrayina flotu kelmeli. Bunıñ sayesinde Ukrayina Qara deñizde global tesir ile devlet ola bilir. Ve elbette sebep Qırımda.
Amma bu kelecekte olacaq şeydir. Şimdi ise Rusiyeniñ Qara deñiz flotunı Aqyardan sıqıştırıp çıqarmaq kerek.
Vitaliy Portnikov – jurnalist ve siyasiy izaatçı, Azatlıq Radiosı ve Qırım.Aqiqat müellifi
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.