Mahsus Qırım.Aqiqat içün
Rusiye prezidenti Vladimir Putinniñ doğğan künü arfesinde «Opozitsionnaya platforma – Za jizn» lideri Viktor Medvedçuk ile körüşüvi aqqında haber keldi – Kreml Ukraina lideri olaraq kimni körmege istegenine dair bir işaret kösterdi. Baqışları Rusiye siyasiy kün tertibine tam uyacaq birini körmege istey.
Mence, Viktor Medvedçuk bu sıfatqa uymaq içün elinden kelgenini yapa. O, Vladimir Putinniñ doğğan kününi tebriklemek içün Novo-Ogarövoğa kele. O, Ukraina parlamentiniñ yerli saylavlar qararını qabul etkeni içün takbih ete, çünki onıñ ve, ebet, Putinniñ fikirince, bu qarar Minsk esnasını toqtata. Emin ki, Rusiye eyyeti degil, Ukraina eyyeti muzakerelerni blok ete. Ve o, ebet, qorantasınen Qırımda raatlana – Rusiye ile dostluqnıñ bütün emiyetini bilgen aqiqiy Ukraina siyasetçisi daa qayda raatlansın? Qırımda özüne ve aile azalarına Rusiye çıqarğan koronavirus aşısını da yapa, amma dünya tibbiyetiniñ onıñ aqibetlerinen bağlı ciddiy şübheleri alâ daa bar. Rusiye siyasiy elitasınıñ loyal vekili kibi areket ete – olar da aşı yaptıra ve sual bermey. Aynı vaqıtta Vladimir Putinden bu aşınıñ Ukraina içün almasına yardım etmesini rica ete. Ve eskiden Rusiye bazarı içün çalışqan Ukraina müessiselerine yardım etmesini istey. Ve Vladimir Putin Ukraina işçileri aqqında tüşüngende yüregi nasıl sızlağanını aytsa, başını sallay.
Medvedçuknı akimiyetke ketirmek meselesi Kreml içün Ukraina yönelişinde eñ müim mesele ola
Bu tsinizm bayramı – Rusiye siyasetiniñ özüdir. Ve Medvedçuk bu qaranlıq gölde özüni, ğaliba, pek raat is ete. Ve Putin ve Rusiye siyasiy elitasınıñ diger vekilleri kerçek siyaset böyle olğanından şübhelenmey. Mence, Moskva Ukraina prezidenti olaraq böyle birini körmege istey. Zaten Moskva bunı bir vaqıt gizlemedi. Amma bir sual bar – Medvedçuk prezident olaraq nasıl saylanacaq? Çünki bütün ukrainalılar deputatlarnıñ işğal etilgen Qırımda raatlanğanına quvanmay. Çünki bütün ukrainalılar Ukrainağa qarşı altı yıl devam etken cenk, Qırım ve Donbas işğali, ölüm ve yıqıluvlardan soñ Putinniñ Ukraina problemleri aqqında aytqanda yüregi sızlay laflarına inanmay. Çünki bütün ukrainalılar Putinniñ rezidentsiyasında Rusiye prezidentine loyal eski sovet ziyaretçileri ile keçirilgen körüşüvlerde olğan şapitonıñ siyaset olğanını tüşünmey. Kreml başqa bir siyasetni bilmese de – bir vaqıt tatlı aşamağan insan desert ne olğanını bilmegeni kibi.
Eminim: Medvedçuknı akimiyetke ketirip, Rusiye ve Ukraina munasebetlerinde olğan bütün problemlerni bir kereden al etmek meselesi Kreml içün Ukraina yönelişinde eñ müim mesele ola. Cenk toqtatıluvı, Qırım ve Donbasnıñ qaytarıluvı, Ukraina topraq bütünliginiñ ğayrıdan tiklenmesi ve eyi qomşulıq munasebetleri degil. Kremlge Putinniñ aytqanlarına razı olacaq Ukraina prezidenti kerek, dep tüşünem. Başqasına Moskva razı olmaycaq.
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Vitaliy Portnikov, kyivli jurnalist, Qırım.Aqiqat müellifi