Mahsus Qırım.Aqiqat içün
Moskva Türkiye ile uçaq seferleri yasağı uzatıla, dep bildirdi. Yasaq iyünniñ soñuna qadar devam etecek. Mayısta Rusiyeniñ paytahtını Türkiye turizm naziri Mehmet Ersoy ziyaret etip, baş nazir muavini Tatyana Golikovanen seferlerni iyünniñ 2-nde yañıdan başlamaq imkânını muzakere etti. Amma, körgenimiz kibi, Rusiye Türkiyeni açuvlandırmağa istey. Türkiyede turist mevsimi endi başlana, ve yaz Türkiye iqtisadiyatınıñ turizmden qazanacaq kârlarğa ümüt etecek vaqtı ola. Rusiye turistleri ise, Antaliya ve Alaniyanı sevgenler, Türkiye kurortlarında olmaycaq.
Eminim, sebep koronavirus pandemiyası degil. Türkiyede hastalıq tarqaluvı vaziyeti daa bir qarar ve iyünniñ 1-nde Rusiye seferleri artqan memleketlerden beter degil. Lâkin Kreml pandemiyanı siyasiy oyunlarda manaçıq olaraq ilk sefer qullanmay.
Türkiyege qarşı iddialarnı yaqında Rusiye Tış işler naziri Sergey Lavrov da seslendirgen edi. Siyasetçi, «Qırımnen bağlı agressiv ukrain teşebbüslerine qol tutuv Rusiye topraq bütünligine qast etüvge teñ kele», dep bildirdi. Türkiyedeki közeticiler Rusiye Tış işler naziriniñ aytqanları rusiyeliler içün türk turist mevsiminiñ soñu manasına kele bile, Turizm naziri Mehmet Ersoy ise Türkiye yarım million turistsiz qala bile, dep aytqan edi.
Rusiye reberliginiñ Ankarağa qarşı diger iddiaları da bar, ebet – hususan Ukrainağa satığan pilotsız cihazlar. Türkiye Tış işler naziri Mevlüt Çavuşoğlu Rusiye zenaatdaşınıñ qabaatlavına cevap berip, «añlaşma Ukrainanen çoq yıl evelsi tizildi», «Rusiye ise Suriye ve diger memleketlerge raketa bere», dep qayd etti. Çavuşoğlu, «Türkiyeniñ Qırım fikri belli. Bunı rusiyelilerge de aytamız. Onıñ qararı siyasetnen bağlı, dep aytamız», dep hatırlattı.
Türkiye reberligi Qırımnıñ Ukrainağa ait olmasından vazgeçip olamay
Türkiyeniñ Qırım fikriniñ belli olması – Rusiye-Türkiye munasebetleriniñ esas maniası olğanına oşay. Türkiye Ukrainağa dron satmasa, prezidenti Recep Tayyip Erdoğan Ukraina prezidentiniñ Volodımır Zelenskıy ile sıq-sıq körüşip, bu bağlarnen Kremlni açuvlandırmasa. Amma Qırım ne olacaq? Türkiye reberligi Qırımnıñ Ukrainağa ait olmasından vazgeçip olamay – ne halqara uquq ceetinden, ne tış siyaset ceetinden, ne iç siyaset ceetinden, ne prezident Erdoğan daima hatırlatqan qırımtatar halqınıñ taqdirinden tarihiy mesüliyet ceetinden.
Ve iç bir turist aqını, eminim, bu obyektiv vaziyetni deñiştirip olamaz.
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Vitaliy Portnikov, kyivli jurnalist, Qırım.Aqiqat müellifi