Bir qaç yıl evelsi Birleşken quvetler operatsiyası mıntaqasından qaytqan qırımtatar faali Veldar Şukurciyev qoluna kene avtomat alıp, Ukrainanı Rusiye arbiy istilâsından qoruy. Qorantasında barışıq ayat planlaştırğan çoq balalı baba kene cenkte. Bu ikâyenen Qırım.Aqiqat Ukrainanı Rusiye tecavuzından silânen qoruğan qırımlılar aqqında maqalelerni devam ettire.

Aqmescitli sabıq iş adamı Ukrainanı qorumaq içün ilk sefer 2014 senesi cenkleşip başladı. Onıñ barışıq ayatını Qırımnıñ Rusiye tarafından zapt etilüvi bozdı. Veldar Şukurciyev ailesinen beraber evini terk etmege mecbur oldı ve Donbasqa Ukrainanı qorumağa ketti. Soñra barışıq ayatına qayttı. Lâkin vaziyet tekrarlandı: Kyivde «vatandaş» olaraq yaşamaq yerine qırımlı kene avtomat ve cenk vazifelerini ala.

«Biz azırmız, ücüm et!»

Rusiye Ukrainağa daa istilâ etmezden evel Veldar Şukurciyev Kyivniñ Territorial mudafaasına kirdi. Rusiyeniñ ücümlerinden bir afta ögüne o, içtimaiy ağlarda memleketini qorumağa azır, dep yazdı. Kütleviy haber vastalarında Rusiyeniñ Ukrainağa ücüm etecek künü muzakere etilgende o, qardaşlarınen beraber er angi künü ücümlerge cevap bermege azır olğanını bildirgen edi.

«16-sı, 20-si, 23-ü (2022 senesi fevral ayı – Rusiye, Ukraina ve halqara kütleviy haber vastaları bu yılnıñ başında aytqan Rusiyeniñ Ukrainağa kerçekleştirecek ücüminiñ künleri). Biz er kün azırmız, ücüm et! Rusiyede añlamalılar ki, yamanlıq imperiyasınıñ soñunı ketirmege azırmız, isteymiz ve yaparmız. Tek bir şart bar: Rusiye Federatsiyasından kelecek er bir terroristniñ cebinde terek urluqları olsun. Keliñiz. Panika yoq, coşqunlıq bar», – dep yazdı qırımlı fevralniñ 17-nde Facebookta.

Rusiye Ukrainağa ücüm etken ilk künlerinden berli Veldar Şukurciyev Kyivni qolunda silânen qoruy. Fevralniñ soñunda o, Ukraina paytahtınıñ soqaqlarında avtomatnen nevbetçilik yaptı. Cenkte yurtdaşı – Kremlniñ sabıq siyasiy mabüsi Gennadiy Afanasyevni kördi.

«Rusiye bunıñ bedelini ömür boyu ödeycek»

Veldar Şukurciyev bu maqale içün Qırım.Aqiqatqa intervyü bergende oña komandanı telefon etti. Qırımlı onen subetleşip, oña daa bir arbiy unvan berildi, dep bildirdi – üyken leytenant.

Keçken sefer leytenant rutbesini o, 2018 senesi Ukrainanı Donbasta qoruğanda aldı. O vaqıt Veldar Şukurciyev Qırım.Aqiqatqa Zafer bayramını Ukraina Silâlı quvetleri erkânında qayd etmege arz ete, dep bildirgen edi. Şimdi bu Kyivni Rusiye istilâsından qorumaq içün motivatsiya oldı, dep ayta o.

«Kyivniñ territorial mudafaasına qoşulmaq – ATO/BQO tecribesinen Ukraina Silâlı quvetlerinde hızmetimniñ mantıqlı devamıdır. Bu daa Qırımda başlağan Rusiye istilâsına qarşı tirenüvimniñ devamıdır. Rusiyeliler endi Kyivge de ücüm etti. Evde oturıp olamadım. Cenk tecribem olğanda çette qalmağa yañlış olur edi. Motivatsiya er vaqıt bir – Qırımnı evge qaytaruv, bütün işğal etilgen topraqlarnı Ukraina yurisdiktsiyasına qaytaruv, Ukraina bayrağını işğalci onı alıp taşlağan yerge qaytaruv», – dep ayttı Veldar Şukurciyev Qırım.Aqiqatqa.

Onıñ fikirince, Rusiye ile cenkniñ esas maqsadı azatlıq oğrunda küreş ola.

«Azatlıq – tek qolunda silânen ölmek degil, azatlığına qast etken duşmannı öldürmek kerek olğan yekâne qıymettir. Tarih köstergeni kibi, qırımtatarlar ukrainlernen birleşip, daima bir küçlü yumruq ola edi ve yollarına çıqqan duşmannı yoq ete ediler. Şimdi de böyle olacaq. Ukraina zapt etilgen topraqlarını keri alır, Rusiye ise ömür boyu bunıñ bedelini ödeycek ve viran etken şeerlerimizni ğayrıdan tikleycek», – dep eminliknen ayta o.

Qırımdan Donbasqa qadar

Aqmescitli sabıq iş adamı Veldar Şukurciyev 2014 senesi Rusiye Qırımnı zapt etkende belli oldı. O, cenkke ve yarımada işğaline qarşı Ukrainağa qoltutuv aktsiyalarında faal iştirak etken edi. Qırım Rusiye kontroline keçken soñ, Aqmescitteki Ukraina medeniyet merkeziniñ qurucılarından biri oldı – Qırımdan Ukrainanen bağlı er şeyni yoq etüv siyasetine qarşı peyda olğan vatandaş birleşmesidir.

Rusiye uquq qoruyıcıları faalni Ukrainağa qoltutuv aktsiyalarında iştirak etkeni içün bir qaç kere tutqan edi. Neticede Veldar Şukurciyev qorantasınen beraber Qırımdan çıqtı ve ATO alanına Ukraina topraq bütünligini qorumağa ketti.

2017 senesi noyabr ayında musulman olğan qırımlı o vaqıt Kyiv patriarhatınıñ Ukraina pravoslav kilsesi olğan, soñra ise tomos alıp, Ukraina Pravoslav kilsesi olğan kilse tarafından «Ukrainağa köstergen fedakârlıq ve sevgi» medalinen taqdirlendi.

Veldar Şukurciyev Donbasta ög sırada olğanda Aqmescitteki dairesinde Rusiye FSBsiniñ hadimleri tintüv keçirdi. Bu tahqiqat areketleri çerçivesinde belli olğanına köre, qırımlı Qırım Ukraina olğanını aytqanı içün separatizmge açıq çağıruv cinaiy davasınıñ mabüsi ola.

Barışıqsever ayatqa qaytqan Veldar Şukurciyev Kyivde raat yaşamağa tırıştı, göñülli oldı, paytahtta çalışa bilmek içün oqudı. Amma cenk onı planlarını kene deñiştirmege mecbur etti.

Qırımlınıñ evge qaytmasını ömür arqadaşı, qızları ve oğlu bekleyler.

Veldar Şukurciyevniñ aytqanına köre, cenkten soñ o, «qorantasınen beraber evge qaytıp, niayet, normal barışıq ayatını yaşamağa istey».

Bundan evel biz Rusiye ile cenkke ketken qırımlı fotoressam, Kremlniñ sabıq siyasiy mabüsi Gennadiy Afanasyev, kefeli faal, çoq balalı baba Sergey Mokrenüv ve sabıq iş adamı, istihbaratçı, «Qırım» batalyonınıñ qurucısı İsa Akayev ve müendis, aq qorçalayıcı Aleksandr Sedov aqqında tarif ettik.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.