Veciye Kaşkasız bir yıl (video)

Tam bir yıl evelsi, 2017 senesi noyabrniñ 23-nde, qırımtatar milliy areketiniñ veteranı Veciye Kaşka FSB ve SOBR hadimleri kerçekleştirgen mahsus tedbirleriniñ şaatı oldı. Uquq qoruyıcılar Aqmescitte dört qırımtatarını tutıp, olarnı Türkiye vatandaşı Yusuf Aytandan para talap etkenlerinde qabaatladı. Qırımtatar faalleri Aytannı Veciye Kaşkadan alğan paranı keri qaytarması içün qandırmağa tırışqanlarını bildirdi. Faqat para keri alınmadı: «dava» mabüsleri Aqmescitteki SİZOda buluna, Veciye Kaşka ise rahmetli oldı. FSBniñ resmiy malümatına köre, faaller tutulğanda qadın yaramağan edi. Oña «ilk yardım» çağırıldı, amma hastahanege ketkende Veciye Kaşka can berdi. Yürek tutuvı versiyası em qorantasınıñ, em advokat Nikolay Polozovnıñ şübelerini doğura. Advokat seksen üç yaşında Veciye Kaşkanıñ ölümini tahqiq etmekte.