Bir kün evel “Veciye Kaşka davası” iştirakçisi Kazim Ametovnıñ qızı Naciye, onıñ babasına, davanıñ başqa iştirakçisi Ruslan Trubaçqa ve Edem Bekirovğa yardım etmek ricasınen Ukraina Yuqarı Radasınıñ insan aqları vekâletlisi Lüdmila Denisovağa muracaat etti.
“Keçken afta olarnı umumiy kameradan mahsus blokqa avuştırdılar. Olar daima videokameralarnıñ nezareti altında. Türme odaları sers, suvuq, divarları betonlı. Babamnıñ apishanede peyda olğan hastalıqlarından (qan basqısı, közleriniñ zayıflaşqanı, yürek ağırları)ğayrı büyrek ve ayaqları da ağırıp başladı. Olarnı atta kezintilerge alıp çıqmaylar, yaramay aşatalar! Babam ağır sabırlı adam olğanını endi bir qaç kere aytqan edim, amma bugün o (dekabr 19 - QA) apis şaraitlerinitasvirlegeni men içün alâmet! Olarnı acele qurtarmaq kerek!” - yazdı Naciye Ametova öz Facebook saifesinde.
O, tevfiq etilgen qırımtatar faali Edem Bekirovnıñ sağlıq alı aqqında da aytıp berdi. Onen beraber bir kamerada “Veciye Kaşka davası”nıñ daa bir iştirakçisi Ruslan Trubaç bulunmaqta.
“Ruslan Trubaç ile bir kamerada 1-inci gruppa saqatı Edem Bekirov otura. Onıñ yüreginde 4 şunt bar - ağır infarkt ve şeker hastalığınıñ aqibetleri. O ayatına zarur olğan künde 16 ilâc içmek kerek, kesilgen hasta ayağınıñ sarğısını deñiştirmek. Bugün o adamnı Ruslan Trubaç baqa, amma o mutehassıs degil. Bekirovğa mahsus baqıluv kerek”, - yazdı Ametovnıñ qızı.
Ombudsmen Denisova, Aqmescit SİZOsında tutulğan qırımtatar Kazim Ametovnıñ aq-uquqları bozulıvı aqqında haber alğanını yazdı.
“Men, Ametovnıñ bozulğan aqlarını tiklemek ricanen Rusiyede insan aqları vekâletlisi Tatyana Moskalkovağa muracaat ettim”, - yazdı ombudsmen.
Daa evel jurnalist Anton Naumlük, “Veciye Kaşka davası”nıñ mabüsleri Ruslan Trubaç ve Kazim Ametovnı Aqmescit SİZOsınıñ mahsus blokına avustırdılar dep bildirdi.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
Aqmescitniñ Kiyev rayon mahkemesi dekabrniñ 4-nde «Veciye Kaşka davasınıñ» mabüsleri Asan Çapuh, Kazim Ametov, Bekir Degermenci ve Ruslan Trubaçnıñ apis müddetini 3 ayğa uzatqan edi.
2017 senesi noyabrniñ 23-nde 82 yaşlı Veciye Kaşka vefat etti. Qırımtatar milliy areketiniñ veteranı FSB ve SOBR keçirgen mahsus tedbirlerniñ şaatı oldı. Uquq qoruyıcılar Aqmescitteki qavelerden birinde qırımtatarları Kazim Ametov, Asan Çapuh, Ruslan Trubaç ve Bekir Degermencini tuttı.
Olarnı Türkiye vatandaşı Yusuf Aytandan para talap etkenlerinde qabaatladılar. Rusiye uquq qoruyıcılarınıñ ücümi vaqtında qırımtatar milliy areketiniñ veteranı Veciye Kaşka yaramadı.Birazdan Veciye Kaşka can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
