Kreml kontrolindeki Qırımnıñ Seyitler rayon mahkemesi vatandaş jurnalisti, «Qırım birdemliginiñ» strimeri Ayder Kadırovğa 25 biñ ruble para cezası berilmesini talap etti. Bu aqta «Qırım birdemliginiñ» faalleri haber ete.
Berilgen malümatqa köre, prokuror, Kadırov ağır hasta olğanı içün ve çağına yetmegen balaları bar olğanı içün mahkemeden 25 biñ ruble para cezası bermesini talap etti.
İmaye razı degil ve Kadırov qabaatsız ola, dep israr ete. Advokat Lilâ Gemeci qayd etkenine köre, müvekkiliniñ sorğu protokolında «isyancı Umicon Dadaconov ve eki doğmuş qardaşı Umidniñ bulunğan yerini bilmey, olardan bir teklif almadı», dep qayd etile.
Bundan ğayrı, imaye tarafı, Kadırovnıñ advokatı Aleksey Ladin onı FSB idaresiniñ binasında körmegende, anda kirsetilmegende, protokol tizilip imzalanğan edi. Qabaatlav teşkerüv neticelerini seslendirdi. Olar tahqiqatçı Şerstükov ve vekâletli Kazantsevniñ şaatlığınen aynı ola. Olar Kadırov FSB binasına istep keçti ve şeker hastası olıp, saat 23:00-ğa qadar aç ve mahsus penceresiz yerde qaldı, dep aytqanlar.
Advokatnıñ bildirgenine köre, prokuror, Kadırov Dadaconovnıñ IŞİD terkibinde olğanını bilip, dep yañlış malümat berdi. Yazışuvda bu yoq, Umiconnıñ Iraqta Musulda olğanınen bağlı bir mesac bar.
Gemeci, abu bakr idn ahmad adlı saifeniñ Dadaconovğa ait olğanını isbatlaycaq bir delil yoq, dep qayd ete, çünki başqa insanlarnen yazışuvda o, farqlı adlarını ayta ve bir sıra bulunğan yerini yaza. Bundan ğayrı, 2015 senesinden berli saife qullanılmay, Dadaconovnıñ doğmuş qız qardaşı ise, FSB hadiminiñ aytqanına köre, qardaşı o yıl Iraqta cenk areketlerinde elâk oldı, dep bildirgen edi.
Tahqiqat yazışuvnıñ bu insanğa ait olğanını belgilemedi, «olarnıñ işi degil» degenler.
Nevbetteki mahkeme oturışuvı mayısnıñ 12-ne planlaştırıla, anda Ayder Kadırov sözüni aytacaqtır.
2021 senesi yanvarniñ 25-nde Rusiye kontrolindeki Qırımnıñ Seyitler rayon mahkemesi vatandaş jurnalisti, «Qırım birdemliginiñ» strimeri Ayder Kadırovnıñ imayesi bergen cinaiy davanı qapatuv muracaatını red etti. Kadırov Rusiye Ceza kodeksiniñ 205.6 maddesine istinaden qabaatlana – «Cinayet aqqında haber etmeme».
2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñ evinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.
Avgustnıñ 31-nde Rusiye quvetçileri tarafından tutulğan dört qırımtatar faali ketmemek şartınen yiberildi.
Sentâbrniñ 3-nde Aleksey Ladinniñ bildirgenine köre, tahqiqatçı ondan ve müvekkili Kadırovdan ilk tahqiqat malümatını aydınlatmama vesiqasını tutıp almağa tırıştı, amma red cevabını aldı.
Ayder Kadırov sentâbrniñ 10-nda 2020 senesi avgustnıñ 31-nde Qırımdaki Rusiye FSBsiniñ hadimleri tarafından tutulğanını izaatladı.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
