Rusiye kontrolindeki Qırımnıñ Seyitler rayon mahkemesi vatandaş jurnalisti, «Qırım birdemliginiñ» strimeri Ayder Kadırovnıñ imayesi bergen cinaiy dava qapatuv muracaatını red etti. Kadırov Rusiye Ceza kodeksiniñ 205.6 maddesine istinaden qabaatlana – «Cinayet aqqında haber etmeme». Bu aqta advokat Emil Kurbedinov yanvarniñ 25-nde bildirdi.
İmayeci, cinaiy dava açılmasınıñ sebebi «VKontakte» içtimaiy ağındaki saife oldı, dep qayd etti. Umitcon Dadaconov adı olğan qullanıcı Qırım sakinlerine andan yazğan edi.
«Bir dane VKontakte saifesinden beş cinaiy dava peyda oldı, men bu saifeni sahte sayam. Açılğan davalardan biri – ağır madde boyunca açıldı. Pek qolay», – dep qayd etti Kurbedinov.
Neticede mahkeme bütün muracaatlarnı red etip, vaqıtsız olğanını ve olarnı eñ yaqın mahkeme oturışuvlarında baqacağını bildirdi.
«Böyle taqip tamamen qanunsızdır, FSB insanlarğa, halqımızğa, hususan jurnalist Kadırov Ayderge kene basqı yapmağa tırışa. Bugünde-bugün Qırımda telükeli bir qapunı açacaq olalar – çaqmama mevzusı. Bir terakt olmadı, kimse terror aktlarını, ateşke berüv ya da patlavlarnı gizlemedi», – dep izaatladı advokat.
2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.
vgustnıñ 31-nde Rusiye quvetçileri tarafından tutulğan dört qırımtatar faali ketmemek şartınen yiberildi.
Sentâbrniñ 3-nde Aleksey Ladinniñ bildirgenine köre, tahqiqatçı ondan ve müvekkili Kadırovdan ilk tahqiqat malümatını aydınlatmama vesiqasını tutıp almağa tırıştı, amma red cevabını aldı.
Ayder Kadırov sentâbrniñ 10-nda 2020 senesi avgustnıñ 31-nde Qırımdaki Rusiye FSBsiniñ hadimleri tarafından tutulğanını izaatladı.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
