Ukraina prezidenti Volodımır Zelenskıy Vaşingtonğa iş ziyareti vaqtında, bugünde işğal etilgen Qırımda on biñlernen rus arbiyi bulunğanı aqqında aytıp berdi.
Bunı o, Jorj Vaşington müzey-çiftliginde Ukrainanıñ çevirilmesi programmasınıñ tanıtılması zamanı qayd etti.
«Muvaqqat işğal etilgen Qırımnı körgende ve anda tahminen 80 biñ rus arbiyi ve tehnikası, flotı bulunğanını bilgende. Muvaqqat işğal etilgen Donbasta daa tahminen 35 biñ arbiy ve daa bir qaç biñ arbiy sıñır boyu olğanını bilgende... Strategiya aqqında tüşünmege qıyın, biz taktika aqqında tüşünemiz», – UNN Zelenskıynıñ aytqanlarından alıntı ketire.
Bundan ğayrı, o, yaqında keçirilecek "Garp-2021" Rusiye-Belarusiye talimleri aqqında ve belki de vaziyetniñ kerginleşmesi olacağı aqqındada hatırlattı.
Baarde Ukraina ve ğarbiy ittifaqdaşları 2014 senesinden berli Ukrainanıñ şarqiy sıñırlarında, işğal etilgen Qırımda, Qara ve Azaq deñizlerinde Rusiyeniñ asker sayısı iç olmağanı qadar arta, dep bildire. Moskva, Rusiye ordusınıñ Rusiyede (olar Ukrainağa ait Qırımnı da sayalar) areket etmesi diger memleketlerni, hususan Ukrainanı qasevetlendirmemeli, dep qayd etti.
Aprelniñ 22-nde Rusiye Mudafaa nazirligi Qırımda «çeşitler arası talimlerni» keçirdi. Anda Rusiye arbiy müessisesiniñ yolbaşçısı Sergey Şoygu keldi. O, Cenübiy ve Ğarbiy arbiy okruglarında arbiy talimlerni yekünlemek qararını aldı ve ordular daimiy qaluv yerlerine qaytacaq, dep ilân etti.
Ukraina prezidenti Volodımır Zelenskıy mayısnıñ 11-nde «Ukraina 30. Memleketniñ telükesizligi» Ukraina forumı çerçivesinde Ukraina telekanallarına intervyü berip, Rusiye Ukrainağa ait yarımadadan tek 3,5 biñ askerini çıqardı, şunıñ içün «kerginleşüv telükesi qala», dep tüşüngenini ayttı.
OSCE Viyana Daimiy şurasınıñ mayısnıñ 27-nde olıp keçken toplaşuvında ABD missiyasınıñ vekili Courtney Austrian Qırımda ve Ukraina sıñırı boyunca Rusiye mart ve aprel ayında arttırğan askerler çekildi degenine baqmadan, silâlı quvetleriniñ büyük qısmı anda qaldı, dep qayd etti.
