Martnıñ 31-inde Ukrainada prezident saylavları keçti. Saylav arfesinde 316 bin Ukraina vatandaşı saylav yerini deñiştirdi. Olardan 5,5 biñ - QMC ve Aqyarda qayd olunğan vatandaşlar. Ekinci tur aprelniñ 21-inde keçecek, ve ekspertler, bu sefer saylav yerini deñiştirmek içün azca vaqıt olacağını qayd ete.
Ekinci turda rey bermek içün qırımlılıar ne yapmalı? Ne vaqiıt? Ne qıyınlıqlar ola bile? Bu suallerge Qırım.Aqiqat cevap berdi.
Ariza bermek
Qırımlılar prezident saylavlarınıñ ekinci basamağında rey berecek olsa, saylav bölügini deñiştirmeli. Martnıñ 31-inde rey bergen adamlar da bu areketni tekrarlamalı.
Bunı er Devlet saylavcılar reyestrinde yapmaq mümkün. Vaqtınca işğal etilgen topraqlar meseleleri boyunca naziriniñ birinci muavini Yusuf Kürkçi aytqanına köre, bu protsedura evelkisinden farqlanmay.
“Protsedura keçken seferki kibi olacaq. Adam başta saylav yerini deñiştirmeli, soñ saylav kününde kelip rey bermeli”, - dedi Kürkçi.
Bundan soñ qırımlığa saylav yeriniñ deñiştirilmesi aqqında malümatname berilmeli, onı ise saylavnıñ ekinci basamağında Ukraina pasportınen beraber saylav bölünginde köstermeli.
Vaqtında yetiştirmek
Ukraina qanunlarına köre, Merkeziy Saylav Komiteti, saylavnıñ birinci basamaq neticelerini 10 kün devamında teşkerip ilân etmeli. Tek bundan soñ qırımlılar saylav yeriniñ deñiştirilmesi içün muracaat ete bile.
Amma birinci turda iştirak etken vatandaslarnıñ episi ekinci basamaqta rey berip olamaz, çünki keçken sefer saylav yerini deñiştirmek içün 85 kün bar edi, şimdi ise beş.
