"Ğolos" siyasiy partiyanıñ başı, "Okean Elzı" taqımınıñ yetekçisi Svyatoslav Vakarçuk, Qırım sakinlerini Hersonğa kontsertke davet ete. Bu aqta o, Facebookta derc etilgen video beyanatında ayttı.
"Qırım sakinlerine mahsus hitabım: biz Qırımda kontsert keçirmege pek ister edik, amma şimdilik sizni Hersonğa davet etemiz. Siz kelirsiz, dep ümüt etemiz. Ve mahsus qardaşlarımıznı - qırımtatarlarnı anda bekleymiz", - dedi Vakarçuk.
Daa evel "Ğolos" firqasınıñ başı qırımtatar muhtariyeti meselesine dair fikrini açıqladı.
Vakarçuknıñ partiyası cedveline ASTEM şirketiniñ başı, Qurultay delegatı Rüstem Ümerov ve "Crimea SOS" teşebbüsiniñ koordinatorı Tamila Taşeva kirdi.
