Link açıqlığı

Saatnıñ esas haberi

Vakarçuk qırımtatar muhtariyetine dair fikrini bildirdi


Svâtoslav Vakarçuk
Svâtoslav Vakarçuk

«Ğolos» («Ses» – QA) firqasınıñ yolbaşçısı, «Okean Elzı» gruppasınıñ lideri Svâtoslav Vakarçuk qırımtatar muhtariyeti meselesinde fikrini bildirdi. Bu aqta o, Azatlıq Radiosınıñ «Newsroom-spetsvıpusk» programmasınıñ yayınında tarif etti.

«Qırımtatar meselesiniñ umumukrain meselesi çerçivesinde baqılmasınıñ tarafdarı olam. Qırımtatarlar toplulıq olaraq Ukraina ve onıñ menfaatlarına nisbeten pek vatanperver yanaştılar. Qırımtatarlar aytqan siyasiy ukrain milletimiz çeşit qavim ve millet, farqlı medeniyetleri olğan insanlar, amma özüni Ukrainanıñ bir qısmı olaraq is etken insanlar olğanını köstere. Eminim, bu ceetten er bir etnik halqnıñ özüni ifade etüv, medeniyet ve peyda oluv ve kimlik terbiyesi aqqı Ukraina içün pek müim ola», – dedi Vakarçuk.

Daa evel haber etilgeni kibi, Svâtoslav Vakarçuknıñ «Ğolos» firqası cedveline ASTEM şirketiniñ icra müdiri, Qırımtatar Milliy Qurultayınıñ delegatı Rustem Umerov ve «KrımSOS» teşebbüsiniñ koordinatorı Tamila Taşeva kirdi.

2018 senesi dekabr ayında prezident Petro Poroşenko Ukraina devleti terkibinde qırımtatar milliy-territorial muhtariyetiniñ qurulmasınen bağlı Anayasa deñişmeleri qanunını Yuqarı Radağa kirsetmege azır olğanını bildirgen edi. Aynı vaqıtta, prezidentniñ aytqanına köre, o vaqıt parlamentte bu qararnı qabul etmek içün 300 rey olıp olmağanına dair malümatı yoq edi.

Ukraina haber siyaseti naziriniñ birinci muavini Emine Ceppar qırımtatar muhtariyetiniñ «separatizmge iç bir alâqası yoq» dep añlatqan edi. Onıñ qurulması ise Ukrainanıñ 2014 senesi qoşulğan BM tamır halqlarnıñ aqlarına dair beyannamesinde qayd etilgen tamır halqnıñ aqqı ola.

Ukraina Yuqarı Radasına firqa cedvelleri boyunca Qırımtatar Milliy Meclisiniñ beş vekili namzet kösterecek: qırımtatar halqınıñ lideri Mustafa Cemilev ve Meclis reisiniñ muavini Ahtem Çiygoz (Petro Poroşenkonıñ «Avropa birdemligi» firqası), Meclis reisi Refat Çubarov (İgor Smeşkonıñ «Küç ve namus» firqası), Gayana Yüksel (Ukrainanıñ yeşiller firqası), Qırımtatar Milliy Meclisiniñ azası ve Abmecit Suleymanov («Ukraina Halq Areketi»).

Yuqarı Rada saylavlarına tek Qırımtatar Milliy Meclisiniñ temsilcileri namzet köstermey. Olarnıñ arasında – ukrain jurnalisti ve qırımtatar asıllı devlet erbabı, Ukraina informatsion siyaseti naziriniñ birinci muavini Emine Ceppar («Ğroysmannıñ ukrain strategiyası» firqası), Qırımtatar Milliy Qurultayınıñ delegatı Rustem Umerov, «KrımSOS» teşebbüsiniñ koordinatorı Tamila Taşeva ve «VostokSOS» hayriye fondunıñ icra müdiri Aleksandra Dvoretskaya (üçü de Svâtoslav Vakarçuknıñ «Ses» firqasından), qırımlı bloger ve dizayner Liza Bogutskaya (Volodımır Zelenskıynıñ «Halq hızmetçisi» firqası), qırımlı, Ukrainanıñ sabıq halq deputatı Andrey Sençenko («Aq küçü»), cemaat faali, göñülli, Qırımdan köçken Natalya Lütikova («Ukraina Halq Areketi»).

XS
SM
MD
LG