Link açıqlığı

Saatnıñ esas haberi

Rusiyedeki mahkemede qırımlı Bektemirovnıñ evini tintken FSB hadimi sorğuğa çekildi – cemaatçılar


Vadim Bektemirov
Vadim Bektemirov

Rusiyeniñ Rostov-na-Donu Cenübiy okrugınıñ arbiy mahkemesinde Qırımdaki «Hizb ut-Tahrir davasınıñ» mabüsi Vadim Bektemirovnıñ evinde tintüv keçirgen FSB hadimi Artem Tütünik sorğuğa çekildi. Bu aqta avgustnıñ 3-nde «Qırım birdemligi» cemaat birleşmesi haber etti.

«Artem Tütünik mahkemege müvekkilini şahsen tanımay, amma onı bile, dep bildirdi. Vadim Bektemirov şaatnı bilmey», – dep aytıla haberde.

Cemaatçılarnıñ malümatına köre, advokat Emil Kurbedinov bu şaatnıñ sorğusından haberdar olmağanını mahkemege añlattı. Buña baqmadan, Tütünik sorğuğa çekildi.

«Qırım birdemligi» qayd etkenine köre, advokatnıñ islâmğa celp etüv cinayet olamı sualine FSB hadimi böyle cevap berdi: «Ananeviy islâmğa celp etüv cinayet sayılmay».

«Uquq qoruyıcı organlarınıñ hadimleri islâm şekillerini nasıl ayıra, o, añlatmadı. Mabüsniñ sualine cevap bergen şaat islâm aqqında açıq menbalardan bilgenini, umumiy şeylerni bilgenini ayttı, soñra sunniy ve şiiyler arasındaki farq aqqında sualge cevap bermege istemedi, «qadimiy zamanlardan doğru kütlengen» islâm ananeviy ola, dep ayttı, ananeviy olmağan islâm ise, şaatnıñ aytqanına köre, «yañlış tercimeden ve tefsirlerden kele, «Hizb ut-Tahrir» azaları ananeviy olmağan islâmnıñ vekilleri ola», – dep aytıla haberde.

Cemaat birleşmesiniñ malümatına köre, bu davanıñ nevbetteki mahkeme oturışuvı avgustnıñ 12-ne planlaştırıla.

Hatırlatamız, 2020 senesi iyülniñ 7-nde Rusiye quvetçileri yedi qırımtatarınıñ evini tintti.

Rusiye FSBsiniñ malümatına köre, mahsus hızmetniñ hadimleri Qırımda «Hizb ut-Tahrirni» teşkil etkeninden ve iştirak etkeninden şübheli sayılğan yedi insannı tuttı. FSB, bu insanlar «Qırım sakinleri arasında terror mefküresini yayıp, qırımlı musulmanlarnı öz saflarına celp etti», dep bildire. Rusiye mahsus hızmetiniñ matbuat hızmeti bildirgenine köre, «(teşkilât) azalarınıñ yaşağan yerlerinde Rusiyede yasaqlanğan «Hizb ut-Tahrir al-İslami» propaganda malümatları, terror faaliyetinde qullanılğan bağ vastaları, elektron malümat taşıyıcıları tapılıp alındı».

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.

«Memorial» aq qorçalayıcı merkezi qırımlı Vadim Bektemirovnı siyasiy mabüs dep tanıdı.

Qırımdaki «Hizb ut-Tahrir davaları»

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG