Kıyiv topraq uzlaşuvlarına ketmeycek, Rusiye ile Qırım mevzusında muzakereler ise yalıñız yarımadanıñ keri qaytarılması içün mümkün varianttır. Bunı Ukrayina Prezidenti ofisiniñ reberiniñ muavini Andriy Sıbiga BBC neşrine bildirdi.
"Bütün topraqlar keri qaytarılmalıdır, topraq uzlaşuvları yoq. Strategik maqsadımızğa irişkenimizde, misal olaraq, memuriy sıñırğa çıqqanımızda, o zaman potentsial olaraq Qırımnıñ qaytarılması ile bağlı diplomatik saife açıla bilir. Amma arbiy yolda da red etilmey", - dedi o.
Keçende Financial Times neşri tarafından yayınlağan materialda, Sıbiga Kıyiv Ukrayina ordusı Qırımnı arbiy yolnen azat etmege başlamazdan evel, Rusiye ile muzakereler ola bilecegine ihtimal bergenini bildirgen edi.
Gazetada, Sıbiganıñ sözleriniñ 2022 senesi aprel ayından bugünge qadar "Rusiye Federatsiyası ile muzakerelerge meraq köstergen eñ aydın beyanat" olğanını qayd ettiler.
Ukrayına prezidenti ofisiniñ yolbaşçı mesleatçısı Mıhaylo Podolâk Qırım.Aqiqat jurnalistlerine Ukrayina Qırımnı beş-yedi aydan qaytarır, dep ayttı.
Satellit resimleri Qırımnıñ şimalinde «Ermeni Bazar» ve Perekop Rusiye keçiş noqtaları rayonında çift okop yolağı bar, dep köstere. Satellit fotoresimleri YE-105 yolunıñ eki tarafında da ve Sivaş gölü yanında yañı fortifikatsion inşaatlarnı kösterdi.
Fevralniñ 24-nde Ukrayina prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirdi.
Ukrayina prezidenti ofisiniñ yolbaşçı muavini İgor Jovkva Qırım.Aqiqatqa intervyü berip, Ukrayinanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep ayttı. Onıñ qayd etkenine köre, kimse Qırım Kıyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
