UNESCO-nıñ aza devletleri Rusiyeniñ Qırımdaki sistematik respressiv siyasetinden ve qanunsız atiqiyat qazmalarından raatsız. Bunıñ aqqında martnıñ 31-nde teşkilâtnıñ 30 aza devleti adından yayınlanğan beyanatta yazıla, dep haber ete Ukraina TİN.
«Beyanatta Rusiyeniñ haber vastalarına qarşı sistematik repressiv siyaseti, jurnalistlerniñ taqip etilüvi, tasil, ilmiy ve meleniy müessiselerniñ arbiyleştirilüvi takbih etile. Delegatsiya qanunsız atiqiyat qazmalar, zararlı konservatsiya işler ve medeniy zenginliklerniñ qanunsız köçürilüvinden raatsız», – dep haber ettiler nazirlikte.
Bundan ğayrı UNESCO-nıñ aza devletleri Rusiyeni işğal etilgen Qırımğa insan aqlarınıñ qorunması içün halqara mehanizmlerniñ maniasız barmasını temin etmege çağırdılar.
Körüşüv vaqtında Ukraina TİN birinci muavini, UNESCO meseleleri Milliy komissiyasınıñ reisi Emine Ceppar, yanvar ayında UNESCO İcra komitetiniñ 210-ncı sessiyada Qırımda vaziyetniñ monitoringini devam etmesi aqqında qararı içün minnetdarlıq bildirdi.
«Ukraina TİN birinci muavini UNESCO azalarını Qırım platorması sammitinde iştirak etmege davet etti ve teşkilâtnı bu halqara mehanizminiñ maqsatlarınıñ amelge keçirilüvine qoşuşmağa çağırdı», – dep qoştılar TİN.
Под натиском «благоустройства»: как древний Херсонес теряет свое лицо (фотогалерея)
Tış işler naziriniñ sabıq muavini Serğiy Kıslıtsâ Parijde UNESCO Baş konferentsiyasınıñ 40-ıncı sessiyasında çıqışta bulunıp, Rusiyeniñ Qırımdaki areketleri Hersones ve Bağçasaraydaki Han sarayı içün «ciddiy telüke» ola, dep bildirdi.
Rusiye Tış işler nazirligi, Qırımda yapılğan qazmalar sebebinden Ukraina tarafından Ermitaj ve Puşkin müzeyine qarşı kirsetken sanktsiyalarnı tenqit etti.
Qırım işğalinden soñ Rusiye Qırımda medeniy ve tarihiy emiyeti olğan bütün obyektlerni öz yurisdiktsiyası altına aldı. Kyiv, olar Ukraina halqına ait olğanını israr etip, mezkür obyektlerni UNESCO imayesi altına almağa rica ete.
2019 senesi sentâbr ayında UNESCO baş müdiri Audrey Azoulaynıñ maruzası aydınlatılğan edi, anda yarımadada vaziyet kerginleşe, dep qayd etile.
Qırımnıñ Rusiye akimiyeti UNESCO maruzalarında berilgen malümatnen razı degil. Qırımnıñ Rusiye medeniyet naziri Arina Novoselskaya UNESCO vekillerini yarımadağa davet etip, medeniy ve tarihiy obyektlerniñ vaziyetine «tarafsız qıymet kesmege» teklif etken edi.
UNESCO Dünya mirası cedveline işğal altındaki Qırımnıñ «Tavrik Hersones» qoruğı kirmekte. Cedvelge kirsetilecek namzetler arasında Bağçasaraydaki Hanlar sarayı, Sudaqtaki Ceneviz qalesi, Qırım astrofizik observatoriyası, Manğup Qale, Eski Kermen ve Çufut Qale bar.