Moskva Lefortovo mahkemesi qırılı Leniye Umerovanı devlet hainliginde qabaatlap apiske aldı. Bu aqta mahkemeniñ saytında haber etile.
Qadı Râbtsev muracaatnı qanaatlendirip, Umerovanı apiske aldı. Evel berilgen malümatqa köre, Rusiye Federatsiyasınıñ FSB hadimleri qırımlı Leniye Umerovanı Vladikavkazdaki Rusiye İç işler nazirligi idaresiniñ vaqtınca tutuv izolâtorından çıqarıp, belli olmağan yerge alıp ketti.
Mayısnıñ 1-nde berilgen malümatqa köre, Şimaliy Osetiya-Alaniya Cumhuriyetiniñ FSBsi yarım yıldan berli Rusiyede tutulğan 25 yaşında qırımlı Leniye Umerovanıñ vesiqalarını aldı.
Bıltır dekar ayında 25 yaşında Leniye Umerova Kyivden Qırımğa ketmege mecbur edi, çünki babasınıñ qanseri bar. Rusiye sıñırcıları Leniye Umerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı.
Ağası Aziz Umerov Qırım.Aqiqatqa izaat berip, qardaşı üç ay devamında çetele vatandaşları içün merkezde tutuldı, der tarif etti. Amma martnıñ 13-nde mahkeme qararınen onı andan azat etip aldılar.
«Advokatlarğa, tuvğanlarına telefon etmege imkân bermediler – gece yarısı onı o merkezden çıqardılar. Bundan soñ vatandaş urbada erkeklernen maşina keldi, başına çuval taqqanlar, belli olmağan yerge alıp ketkenler ve soqaqqa atqanlar», – dep tarif etti Umerov.
Aman-aman birden Leniyeni vesiqaları olmağanı içün polis patruli tuttı, dep tarif etti ağası. Rusiye mahkemesi ise onı 15 künge apiske aldı. Soñra qızğa qarşı daa eki protokol tizildi – ana-babasına telefon etmek içün qullanğan telefonını vaqtında bermegeni ve konvoy maşinasından çıqmağa razı olmağanı içün. Eki sefer de mahkeme Ukrayina vatandaşınıñ apis müddetini 15 künge uzattırdı.
Qırım Muhtar Cumhuriyeti ve Aqyar prokuraturası Rusiye tarafından qırımtatarı Leniye Umerovanıñ tutulğanını tahqiq etip olamay, çünki bu cinayet Qırımda olmağan.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
