Qırım Muhtar Cumhuriyeti ve Aqyar prokuraturası Rusiye tarafından qırımtatarı Leniye Umerovanıñ tutulğanını tahqiq etip olamay, çünki bu cinayet Qırımda olmadı. Bu aqta prokuraturanıñ matbuat hızmeti Qırım.Aqiqatqa bildirdi.
«Bu adiseni bilemiz, malümatnı taqip etemiz, lâkin bu vaziyette cinayetni qayd etmege imkânımız yoq, cinayet yeri Qırım degil. Ne yazıq ki, qanun bu», – dep tarif etti prokuratura.
Leniyeniñ ağası Aziz Umerov Qırım.Aqiqatqa izaat berip, qız qardaşı üç ay devamında çetel vatandaşları içün merkezde tutuldı, dep tarif etti. Amma martnıñ 13-nde mahkeme qararınen onı azat ettiler.
«Advokatlarğa, tuvğanlarına telefon etmege imkân bermediler – gece yarısı onı o merkezden çıqardılar. Bundan soñ vatandaş urbada erkeklernen maşina keldi, başına çuval taqqanlar, belli olmağan yerge alıp ketkenler ve soqaqqa atqanlar», – dep tarif etti Umerov.
Aman-aman birden Leniyeni vesiqaları olmağanı içün polis patruli tuttı, dep tarif etti ağası. Rusiye mahkemesi ise onı 15 künge apiske aldı. Soñra qızğa qarşı daa eki protokol tizildi – ana-babasına telefon etmek içün qullanğan telefonını vaqtında bermegeni ve konvoy maşinasından çıqmağa razı olmağanı içün. Eki sefer de mahkeme Ukrayına vatandaşınıñ apis müddetini 15 künge uzattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
