Eger dünya işğal altındaki Qırımnıñ Rusiyede qalmasını qabul etse, bu, bütün dünya içün soñ derecede telükeli signal olacaq. Buña NATO sabıq baş kâtibi ve Daniya baş nazirni Anders Fog Rasmussen emin.
Anders Fog Rasmussen, Rusiye Ukrayinanıñ özek silâsızlaştırılması qarşılığında Ukrayinanıñ (Qırım şu cümleden) sıñırlarınıñ tanılması mevzusında kendi imzalağanı bir añlaşmanı bozğanını hatırlattı.
O, Qırım Ukrayinağa qatmalıdır, akis alda bu, diger tecavuzkârlarğa sıgnal olacaq, dep qoştı: "Olar, eger Putin Qırımnı ala bilse, men de Tayvanni ala bilem, kibi neticege kele bilirler".
Qırım bu Ukrayina toprağıdır. Şunıñ içün Putinniñ buña qarşılığı ne olcağı maña epsi birAnders Fog Rasmussen
Rasmussen, Rusiye prezidenti Vladimir Putin içün Qırımnıñ işğalini devam etmesiniñ pek müim olğanını saya, amma aynı zamanda şunı qayd ete: "Putinniñ reaksiyasından qorqmamalımız. Elbette, arbiy küç ile ve pek sert bir şekilde cevap berir edi. Amma ne içün bu bizni toqtatmalı?".
"Qırım bu Ukrayina toprağıdır. Şunıñ içün Putinniñ buña qarşılığı ne olcağı maña epsi bir, amma menim içün Ukrayinanıñ ğalebesi Qırımnı keri almaqtır", - dep bildirdi o.
Rasmussen amerikalılarğa muracaat eterek dedi: "Tayvanni mudafaa etmek içün resurslarğa ihtiyacalarımız olğanı içün Ukrayinağa yardımnı eksiltmemiz kerek olğanımızğa dair amerikalılarnıñ delillerini eşitkende şunı aytmaq isteyim: kerçekten bu eki çatışma soñ derecede bağlılar. Ukrayinanıñ qorunmasına yardım etmeknen Tayvange ücümniñ qarşısına da alamız”
Andersa Fog Rasmussenniñ beyanatları, ABD Atlantik şurasınıñ Ğarpnıñ Ukrayina içün telükesizlik teminatlarını yaratma ğayretleri ve iyül ayındaki NATO sammitine azırlıq strategiyası ile bağlı onlayn muzakeresi vaqtında seslendirildi. Munaqaşada Ukrayina Prezidenti ofisiniñ reberi Andriy Yermak da iştirak etti.
Donbas Ukrayinadır, Qırım Ukrayinadır. Ortaqlarmıznıñ bizim bu noqta-i nazaramıznı ürmet etkenlerini bilemAndriy Yermak
Qırımnıñ qaytarılması qarşı ücümniñ maqsadı olıp olmaması sualine cevap bergen Yermak dedi: "Maqsatlarımız içün pek açıqmız. Ğalebemizniñ Ukrayinanıñ bütün topraqlarınıñ halqara seviyede tanılğan sıñırlarda keri qaytarılması olğanını defalarca ayttıq. Donbas Ukrayinadır, Qırım Ukrayinadır. Ortaqlarmıznıñ bizim bu noqta-i nazaramıznı ürmet etkenlerini bilem. İç biriniñ biz ile bu mevzuda er angi bir uzlaşma aqqında laf etmege tırışqanını körmedim. Bizim noqta-i nazarımız ğayet aydın ve pritsipialdir, şunıñ içün biz topraq bütünligimiz, suverenitetimiz ve mustaqilligimizni köz ögüne alğan bütün tekliflerni diñlemege azırmız".
"Amerika Sesi" haber etkeni kibi, iyünniñ 21-nde ABD Kongressiniñ Temsilciler Palatasınıñ Tış işler komiteti ükümetni Ukrayinağa ATACMS uzaq menzilli raketalar bermege çağırğan Qarar leyhasına deytekledi.
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
