Cumaaqşamı künü, mayısnıñ 18-nde, qırımtatarlarnıñ sovetler rejimi tarafından Qırımdan sürgün etilüviniñ 79 yılı tola. Ukrayına ve dünya qırımtatar halqı genotsidiniñ qurbanlarını añalar.
1944 senesi mayısnıñ 18-nde sovetler rejimi qırımtatar halqını Qırım yarımadasından Orta Asiya ve Uralğa sürgün etip başladı. Umumen 200 biñ insan sürgün etildi. 40 yıldan ziyade insanlarğa vatanları Qırımğa qaytmağa yasaqlandı. Çeşit malümatlarğa köre, yolda ve sürgün yerlerinde zorbalıq, açlıq, suvuq ve hastalıqlardan sürgün etilgenlerniñ aman-aman yarısı vefat etti.
Ukrayına Yuqarı Radasınıñ qararına köre, mayısnıñ 18-i Qırımtatar halqı genotsidiniñ qurbanlarını añma künü dep ilân etildi.
Mayısnıñ 18-nde Ukrayınada Qırımtatar halqı genotsidiniñ qurbanlarını añma matem tedbirleri keçirile, amma bu yıl, keçken sene olğanı kibi, kütleviy tedbirlerniñ keçirilüvine Rusiyeniñ arbiy istilâsı ve Qırım işğali tesir etkenler.
Bugün Ukrayına paytahtında qırımtatar halqı ile birlemlik köstermek içün Kyivdeki baş Ukrayına bayrağı endirildi.
Kyivde mayısnıñ 18-nde saat 12:00-de Qırımtatar halqı genotsidiniñ qurbanlarını añma künü munasebetinen Ukrayına aq qorçalayıcıları «Qırımtatarlarğa qarşı cenk cinayetleri – 1944 senesi sürgünlikni kerçekleştirgenlerniñ üslübi» adlı matbuat konferentsiyasını keçirecek. Kyivniñ demiryol vokzalında «Tarihnı hatırlap, topraqlarımıznı keri alamız» hatıra tedbiri ötkerilecek.
Qırımtatar resurs merkezi (QRM) Qırımtatar halqı genotsidiniñ qurbanlarını añma kününe bağışlanğan «içtimaiy ağlarda furtuna» başladı, dep ilân etti.
Mayısnıñ 17-nde Qırım musulmanları diniy idaresi Kyivde «Hatırlay, küreşemiz, ğalebe qazanacaqmız» adlı tedbir keçirdi. Qırımtatar halqı genotsidiniñ qurbanlarına bağışlanğan duada Qırım müftisi Ayder Rustemovnen beraber Romaniya müftisi Murat Yusuf ve Litvaniya müftisi Romas Yakubauskas iştirak etkenler.
Resmiy tedbirler Ukrayına ve dünyanıñ bir çoq şeerinde keçirilecek – Praga, Berlin, Varşava, Kanada, Litvaniya, Poloniya, Romaniya, Türkiye ve digerlerinde.
Ukrayına Tış işler nazirligi çeteldeki diplomatik temsilciliklerine mayısnıñ 18-nde devlet bayrağı yanında qırımtatar milliy bayrağını kötermege emir berdi.
Rusiye işğal etken Qırımda ise Rusiye uquq qoruyıcıları qırımtatarlarğa Qırımtatar halqı genotsidiniñ qurbanlarını añma kününe bağışlanğan kütleviy toplaşuvlar vaqtında «qanun bozulmaycaq» dep, tenbi kâğıtlarını berdi, dep bildire «Qırım birdemligi» cemaat birleşmesi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
