Ukrayina TİN noyabrniñ 24-nde Rusiyeniñ Rostov-na-Donu şeeriniñ Cenübiy bölgesiniñ arbiy mahkemesiniñ qırımlı vatandaş jurnalistler Osman Arifmemetov, Ruslan Suleymanov ve Rustem Şeyhaliyev ve faaller Yaşar Muyedinov ve Enver Ametovğa çıqarğan ükümlerni takbih etti.
"Osman Arifmemetov, Ruslan Suleymanov ve Rustem Şeyhaliyev 14 yıl sert apis cezasına mahküm etildi. Yaşar Muyedinov ve Envera Ametov 13 yıl apis cezasına mahküm etildi. Böylece, qırımlı siyasiy mabüslerniñ umumiy mahkümiyet müddeti 1300 yılğa yaqınlaşa", - dep yazıla Ukrayina Tİn izaatında.
Nazirlik, 2019 senesi mart ayında vatandaş jurnalistleri terroristik teşkilâtınıñ teşkil etilüv, onıñ faalitinde iştirak etüv ve akimiyetni elge keçirmege azırlanuv ile qabaatlanıp tevqif etilgenlerini hatırlata.
Ukrayina TİN dünya toplulığını ve "Qırım platforması"nıñ ortaqlarını Putin rejimi tarafından qanunsız tevqif etilgen bütün Ukrayina vatandaşlarınıñ deral azat etilmesi içün Rusiyege tazyıqnı devam etmege çağırdı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
