Ukrayına Silâlı quvetleri ücümni azırlay – qayda ve ne vaqıt belli degil, amma Ukrayına arbiy-siyasiy reberligi onı keniş tarzda ilân ete. Azırlıq alâmetlerini talilci ve jurnalistler köre. Rusiyeniñ areketlerini ne içün strategik mudafaa dep adlandıralar? Ne içün Ukrayına planlarına qarşı ücüm degil, ücüm dep aytalar? Mudafaa quvetleri küzde aman-aman bütün Harkiv vilâyetini ve Herson vilâyetiniñ sağ tarafını azat etkende areketleri nenen farqlana edi? Bu aqta Donbas.Realii Radiosı (Azatlıq Radiosınıñ leyhası) mustaqil arbiy ekspert, Ukrayına Silâlı quvetleriniñ general-mayorı, «Ögrenüv ve gibrid telükelerge qarşı talil merkezi» cemaat teşkilâtınıñ reberi Serğiy Savçenoknen subetleşti. Esas suallerniñ cevaplarını aydınlatamız.

Rusiye cebede şimdi ne yapa?

Rusiye strategik mudafaağa keçti. Arbiy ilimlerde strategik mudafaa degen şey yoq, amma qullanıla. Rusiye Federatsiyasınıñ quvetleri çatışma hattında iç bir ücüm areketlerini yapmay, strategik mudafaa operatsiyasını keçire.

Strategik mudafaa operatsiyası ücüm yönelişlerinden er birinde keniş gruppirovka quruluvı demek. Rusiyeniñ ücüm imkânları yoq, şunıñ içün mudafaağa mecbur.

Rusiye strategik mudafaa operatsiyasınıñ maqsadı ne?

İstilâcınıñ bu operatsiyasınıñ maqsadı ücüm etken duşmanını, bu vaziyette Ukrayına Silâlı quvetlerini bir yerde toqtatıp, ücüm imkânlarını yoq etmek ve qarşı ücüm kerçekleştirmek ola.

Bir yönelişte ücümni toqtatuv aqqında aytıla ve bu evelden planlaştırıla – ücüm operatsiyası kibi. Soñra uruş başlana.

Ukrayına Silâlı quvetleriniñ qarşı ücümine tesir etecekmi?

E, amma Rusiye strategik mudafaağa keçkeni içün degil – çünki Ukrayına Silâlı quvetleriniñ küz qarşı ücümi arfesinde istilâcı ücüm imkânlarını bitirdi ve mudafaağa keçti.

Rusiye bu sefer ne yapacaq?

«Yahşı niyet areketlerini» beklemege kerekmeydir. Rusiye Ukrayına ordusını toqtatmağa ve soñunace küreşmege tırışacaqtır. Bu sefer Rusiyeden ğayrı çekilecek başqa bir yer yoq.

Büyük ihtimalnen, Ukrayına Silâlı quvetleriniñ qarşı ücümi Cenüpte olacaq. Rusiye ordusı Melitopolge çekilecek, Ukrayına Mudafaa quvetleri Azaq deñizine çıqacaq. Böylece, Zaporijjâ, Herson vilâyetleri ve Qırımda qalğan Rusiye Federatsiyasınıñ ordusı Azaq deñiziniñ yalısı boyunca kesilecek. Keriç köprü daa olsa, istilâcı içün logistika kene de bayağı qıyınlaşacaq.

Rusiye cenkni iç toqtatmasa – bunıñ ihtimali pek az – qalmağa ve Ukrayına Silâlı quvetleriniñ qarşı ücümini bozmağa tırışacaq. Rusiye Federatsiyası qarşı darbe gruppirovkasını da azırlay bile. Ukrayına Silâlı quvetleri bir etapta toqtasa, qarşı darbe endirilecek, belki de, başqa bir yönelişte. Ukrayına ordusı Melitopolge ücüm etse, qarşı darbe Harkiv yönelişinde yapıla bile.

Rusiyege mudafaası yardım etermi?

Bu qolay bir kezinti olmaycaq. Aynı vaqıtta zemaneviy tam ücüm vastaları sayesinde bu fortifikatsion inşaatlarnı yoq etmege imkân bar. Patlatılmaycaq qoralar – meselâ, «ajderha tişleri» – Ukrayına Silâlı quvetleriniñ ilerilemesi içün büyük telüke yapmaycaqtır.

Mayın-patlayıcı qoralar – daa ciddiy bir şey. Tayama noqtaları – bu da ciddiy. Amma çölni başından soñunace mayın-patlayıcı qoralarnen qapatmağa mümkün degil. Ğarbiy ortaqlarımız Ukrayınağa çoq tehnika bere, mayın-patlayıcı qoralarnı yeñecek soyunı da. Başqa bir üslüp de bar – olardan keçmek. Qayda olğanı körüne.

Ne içün qarşı ücüm degil, ücüm aqqında aytıla?

Qarşı ücüm – duşman ücüm etse, yedeklerini qullansa, ordusı ücüm kerçekleştirse ve yedekleri bitkende qarşı darbe endirile, qarşı ücüm başlana. Bu ücüm etken duşmannıñ qarşı üjjümi. Böyle qarşı ücümke keçmek içün kelişken bir vaqıt tapmaq pek zor. Amma mında darbe endirmek içün şaraitler pek kelişe.

Bizimki qarşı ücüm degil, ücümdir – duşmannıñ azırlanğan mudafaasına ücüm. Doğrusını aytqanda, bu ücümni büyük telâşnen bekleymiz. Askerlerimizge, komandanlığımızğa işanamız, ğalebege inanamız, amma bu zafer qıyın olacaq ve deşetli uruşlar olacaq.

Bu ücüm küçlü aviatsiya yardımı yapılmayıp keçecek. Bu faktor bizge qarşı olacaq. Ava mudafaa quvetlerinen ordunı qapatmaq ıntıluvlarımız añlaşıla – aviatsiya olmasa, bu üslüp kelişe. Qıyaslap baqıñız: er kün haber alamız – Rusiye Federatsiyası aviatsiyadan darbe endire: 30, 40, 47 darbe ve bizim aviatsiya darbelerimiz endirile – onğa qadar. Ümüt etemiz ki, alğan ava mudafaa vastaları sayesinde duşman ücüm etken quvetlerimizge yaqınlaşıp olamaz.

2022 senesi küzde Ukrayına ordusınıñ taktikası aqqında

O vaqıt birden üç darbe azırlanğan edi: Herson, Zaporijjâ ve Harkiv. Er kes Zaporijjâğa ücüm etilecek dep bekledi, amma Hersonğa, soñra ise Harkivge darbe endirildi. Ve Harkiv yönelişinde bu darbeni duşman beklemegen edi.

Taktik afara ola bile. Amma ücüm afarasını yapmaq imkânsız. Kâinattan, radio subetleriniñ kontroli vastasınen, çalışqan radio stantsiyalarınıñ şiddeti, bağ vastalarınen episi yahşı körüne – duşmanğa da, bizge de.

Duşmannıñ ateşnen uruluvı bayağı rol oynacaq. Ücüm operatsiyası kütleviy ateş darbeleriniñ endirilüvinen başlana.

Ukrayına Silâlı quvetleri azırlağan tedbirlerge oşağan arbiy operatsiyalar tarihta barmı?

Olacaqlarnıñ analoglarını arbiy sanat tarihı daa bilmey. Olğanlar – «Sahradaki furtuna», keniş arbiy zıddiyet, bir tarafnıñ digerinden arbiy imkânları daa az edi. Koalitsiya tehnik ceetten Iraq ordusından bayağı küçlü edi.

Rusiyeniñ Ukrayınağa qarşı cenkinde eki ordu da yüksek seviyede temin etildi. Rusiye Federatsiyası T-34 qullansa da, uçucısızları, aviatsiyası bar. Eki büyükniñ çatışması tarihta ilk olacaqtır.

Metinni Ludmila Fedorçuk, Svetlana Kuzmenko, Denis Timoşenko azırladılar

MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.