Ukrayina sakinleriniñ çoqusı Qırım işğalden azat etilgen soñ muhtariyet statusınıñ saqlanmasına qoltuta. Buña "Siyasiy talil mektebi" cemaat teşkilâtınıñ sımarışı ile "Reyting" içtimaiyat gruppası tarafından keçirilgen soravnıñ neticeleri delâlet ete, dep yaza "Suspilne".
Oktâbr ayınıñ 10-14 künleri arasında vaqtınca işğal etilgen bölgelerden ğayrı Ukrayinanıñ bütün vilâyetlerinde 18 yaştan büyük olğan eki biñ kişi arasında keçirilgen soravnıñ neticelerine köre, iştirakçilerniñ yüzde 45-i Qırım işğalden azat etilgen soñ muhtariyet statusınıñ saqlanmasına qoltuta.
Soravda iştirak etkenlerniñ yüzde 32-si Qırım vilâyetiniñ qurulmasına qoltuta, yüzde 17-si Qırımtatar Milliy Muhtariyetiniñ qurulmasını destekley eken. Yüzde 5-i cevap berip olamağan, daa yüzde 1-i Qırımnıñ idare etilmesiniñ teşkili içün başqa variantlar teklif etken.
Oktâbr ayında Qırımtatar Milliy Meclisiniñ reisi Refat Çubarov bildirgenine köre, Qırım Muhtar Cumhuriyeti ve Aqyar Ukrayina Anayasası belgilegen vekâletlerni yerine ketirecek «milliy-territorial muhtariyet olmalı».
Baarde Ukrayina Prezidenti ofisi yolbaşçısınıñ mesleatçısı Mıhaylo Poldolâk, yarımada işğalden azat etilgen soñ Qırım muhtariyet statusından marum etile bilecegini farz etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
