Qırımtatar Milliy Meclisiniñ reisi Refat Çubarov bildirgenine köre, Qırım Muhtar Cumhuriyeti ve Aqyar Ukrayına Anayasası belgilegen vekâletlerni yerine ketirecek «milliy-territorial muhtariyet olmalı». Bu aqta Çubarov «Qırım platformasınıñ» ekinci parlament sammitinde ayttı.
Onıñ aytqanına köre, onıñ quruluvı aşağıdakilerni temin etmeli:
- Ukrayına topraq bütünliginiñ deñişmemesi,
- Tamır qırımtatar halqınıñ kelecegini belgilev aqqını yerine ketirüv,
- İnsan ve vatandaşnıñ aynı aq ve serbestlikleri,
- Qırım yarımadasınıñ turğun inkişafı.
«Ukrayına devlet suverenitetiniñ yañıdan tiklenüvinen Qırımnıñ reintegratsiya vaqtı kelecek. Bu etapta uquqiy şartlar ve Qırım, onıñ tamır halqları ve yarımadada yaşaycaq bütün Ukrayına vatandaşlarınıñ kelecegini belgilegen mehanizmler pek müim», – dedi Çubarov.
Onıñ bildirgenine köre, «işğal etilgen Qırımda, işğal etilgen diger Ukrayına topraqlarında yerleşken çetel vatandaşları ya da vatandaşlığı olmağan insanlar cinayet yaptı, hırsızlanğanını aldı, şunıñ içün Qırımnı acele terk etmeliler. Başqa çareleri olmaycaq».
«Qırımdan qaçqan Rusiyege yarımadada büyük kolonistler ordusı şeklinde qalmağa imkân bermeycekmiz. Qıymetli dostlar, Ukrayınanıñ sadıq dostlarını birleştirgen Qırım platforması sayesinde bugün, Rusiye Federatsiyasınıñ bir qaç ortağından ğayrı, bütün halqara toplulıq Rusiyeniñ Ukrayınağa qarşı cenki Qırımda başladı, Qırımnıñ azat etilüvinen de bitecek, dep inana», – dep ayttı Çubarov.
Pragada oktâbrniñ 24-nde «Qırım platformasınıñ» ekinci parlament sammiti başladı. Ukrayına Yuqarı Radasınıñ spikeri Ruslan Stefançuknıñ aytqanına köre, tedbirde bütün dünyadan tahminen 70 parlament eyyeti iştirak etecek. Stefançuknıñ fikirince, Ukrayına suvereniteti ve topraq bütünligi içün «küçlü» bir yardım.
Ukrayınanıñ teşebbüsinen olğan «Qırım platforması» halqara koordinatsion mehanizm 2021 senesi avgust ayında Kyivdeki tesis sammitinde başlatıldı. Platformanıñ maqsadı – halqara kün tertibinde Qırımğa diqqatnı saqlap qalmaq, Qırımda insan aqlarını qorumaq, yarımadanıñ işğalden azat etilüvine yardım etmek ve ilâhre.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
